މިޔަންމާގައި ރޮހިންޖާ މުސްލިމުންނާ ދެކޮޅަށް ހިންގި ގަތުލުއާއްމަށް ފިލުމަށް ބަންގްލާދޭޝްއަށް ހިޖުރަކުރި 7 ލައްކައެއްހާ ރެފިއުޖީން އަނބުރާ މިޔަންމާއަށް ފޮނުވާލުމުގު މަސައްކަތް ބުރާސްފަތި ދުވަހު ފަށާނެ ކަމަށް ބަންގްލާދޭޝްއިން މިޔަންމާއަށް އަންގައިފިއެވެ.
ވެރިރަށް ޔަންގޯންގައި ބޭއްވި ނޫސްވެރިންގެ ބައްދަލުުވުމެއްގައި މިޔަންމާގެ މިނިސްޓަރ އޮފް ސޯޝަލް ވެލްފެއާ، ރިލީފް އެންޑް ރިސެޓްލްމަންޓް ވިން މިޔަޓް އާއެ ވިދާޅުވިގޮތުގައި، މިއަހަރުގެ ޖަނަވަރީ މަހު ދެގައުމުގެ ދެމެދުގައި ގާއިމުކުރެވުނު އެއްބަސްވުމާ އެެއްގޮތަށް ރޮހިންޖާ މުސްލިމުން އަނބުރާ ފޮނުވާލުމުގެ މަސައްކަތް މިހަފުތާތެރޭގައި ބަންގްލާދޭޝްއިން ފަށާނެއެވެ.
މިޔަންމާގެ މަސްއޫލުވެރިން ބުނިގޮތުގައި ނޮވެންބަރު މަހުގެ މެދުތެރޭގައި 2250 މީހުން ފޮނުވާލެވޭނެއެވެ. އަދި ފޮނުވާނީ ދުވާލަކު 150 މީހުންނެވެ. ދެގައުމު އެއްބަސްވެފައި ވަނީ އެވެރެޖްކޮށް ހަފުތާއަކު 1500 މީހުން ފޮނުވާށެވެ.
ބަންގްލާދޭޝްގެ ރިޕެޓްރިއޭޝަން ކޮމިޝަނަރު އަބުލް ކަލާމް ވިދާޅުވީ ރޮހިންޖާ މުސްލިމުން ފޮނުވާލަން ވަކި ތާރީޚެއް ކަނޑައެޅިކަން އޭނާއަށް އެނގިފައި ނުވާކަމުގައެވެ. "އަަހަރުމެންގެ ޚާރިޖީ ވުޒާރާއިންވެސް އަދި އެހެން މަތީ އިދާރާއަކުންވެސް އެގޮތަށް ނިންމައި އަހަރެންނަށް އަންގާފައެއް ނުވޭ." އޭނާ ވިދާޅުވިއެވެ.
ރޮހިންޖާ މުސްލިމުން އެމީހުން ދިރިއުޅެމުން ދިޔަ މިޔަންމާގެ ރަކައިން ސްޓޭޓަަށް އަނބުރާ ފޮނުވާލަން ފަށާ ޚަބަރު ފެތުރުމާއެކު އދ. އިން ވަނީ ތެޅިގަނެގެން ރޮހިންޖާ މުސްލިމުން ބަންގްލާދޭޝްއިން ބޭރުކުރުން މަޑުޖައްސާލުމަށް ގޮވައިލާފައެވެ.
"ތެޅިގަނެގެން މީހުން އަނބުރާ ފޮނުވާލުމުގެ ރޭވުންތައް ހުއްޓާލުމަށް ބަންގްލާދޭޝްއާއި މިޔަންމާގެ ސަރުކާރަށް އަހަރެން ގޮވާލަން." މިޔަންމާއަށް އދ. އިން ކަނޑައަޅާފައި ހުންނަވާ ޚާއްސަ ރެޕެޓުއާ ޔަންގީ ލީ ނެރުއްވި ބަޔާނެއްގައި ވެއެވެ. ލީ ވިދާޅުވީ އަނބުރާ ދާ މީހުންނަށް އަނިޔާ ކުރުމުގެ ފުރުސަތު އޮތްކަމަށާއި، ރަކައިން ސްޓޭޓް ހާލަތު އެގޮތަށް މީހުން އެނބުރިދިއުމަށް އަދި ތަންނުދޭ ކަމަށެވެ.
ފާއިތު ޖަނަަވަރީ މަހު ރެފިއުޖީން އަނބުރާ ފޮނުވާލުމާ މެދު އުސޫލީ ގޮތުން ދެގައުމު އެއްބަސްވެފައިވާއިރު، ފާއިތުވި އޮކްޓޯބަރު ދެގައުމުން ނިންމާފައިވަނީ މި ނޮވެންބަރު މަހުގެ މެދުތެރޭގައި އެ މަސައްކަތް ފެށުމަށެވެ.
ރޮހިންޖާ މުސްލިމުންނަކީ މިޔަންމާ ރައްޔިތުން ކަމުގައި އެގައުމުން ބަލައިނުގަނެއެވެ. އެގައުމުގެ ބުޑިސްޓުން ރޮހިންޖާ މުސްލިމުންނަށް ކިޔަނީވެސް ބަންގާޅީންނެވެ. އެމީހުން ދެކޭގޮތުގައި އެއީ ބަންގްލާދޭޝްއިން އައިސް މިޔަންމާގައި ވަޒަންވެރިވެ ތިބި ބައެކެވެ.
