މިފެށޭ 11 ވަނަ ދައުރުގެ ރައީސުލްޖުމްހޫރިއްޔާގެ ޙައިސިއްޔަތުން އެމަނިކުފާނުގެ އެންމެ އިސްވާޖިބެއް ކަމަށް ދެކެވަޑައި ގަންނަވަނީ ރައްޔިތުންގެ ވެރިކަން ރައްޔިތުންގެ ކިބައިގައި ދެމިއޮތުން ކަށަވަރު ކުރުން ކަމަށް ރައީސް މުންތަޚަބު އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
އެ މަނިކުފާނު މިހެން ވިދާޅުވެފައިވަނީ މިއަދު ކުރެއްވި ޓްވީޓެއްގައެވެ. "މިފެށޭ 11 ވަނަ ދައުރުގެ ރައީސުލްޖުމްހޫރިއްޔާ ކަމަށް އިންތިޚާބުވެފައިވާ ރައީސްގެ ޙައިސިއްޔަތުން އަޅުގަނޑުގެ އެންމެ އިސްވާޖިބެއް ކަމަށް ދެކެނީ ރައްޔިތުންގެ ވެރިކަން ރައްޔިތުންގެ ކިބައިގައި ދެމިއޮތުން ކަށަވަރު ކުރުން،" އެމަނިކުފާނު ވިދާޅުވިއެވެ.
ސެޕްޓެމްބަރު 23 ވަނަ ދުވަހު ރާއްޖޭގައި ބޭއްވި ރިޔާސީ އިންތިޚާބުގައި މިހާރުގެ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމާ ވާދަކުރައްވައި އިބްރާހީމް މުޙައްމަދު ޞާލިޙު އިންތިޚާބު ކާމިޔާބު ކުރެއްވީ ތަނަވަސް އަޣުލަބިއްތަކުންނެވެ. އިބްރާހީމް މުޙައްމަދު ޞާލިޙަށް ލިބިވަޑައިގެންނެވީ ވޯޓުލީ މީހުންގެ 58 ޕަސެންޓެވެ. ރައީސް ޔާމީނަށް ލިބިވަޑައިގެންނެވީ 41 ޕަސެންޓެވެ.
ރައީސްކަމުގެ ހުވައި އިބްރާހީމް މުޙައްމަދު ޞާލިޙު ކުރެއްވުން އޮންނާނީ ނޮވެމްބަރު 17 ވަނަ ދުވަހު ހަވީރު 5:00 ގައެވެ. އެ ރަސްމިއްޔާތުގައި ރާއްޖެއާއި ރާއްޖެއިން ބޭރުގެ ޢިއްޒަތްތެރިން ބައިވެރިވެ ވަޑައިގަންނަވާނެއެވެ. އެ ރަސްމިއްޔާތަށް ޖުމްލަ 11،500 މީހުންނަށް ދަޢުވަތު ދެއްވަން މަސައްކަތް ކުރައްވާ ކަމަށް އެމްޑީޕީގެ ޗެއާޕާސަން ޙަސަން ލަޠީފް ވަނީ ވިދާޅުވެފައެވެ.
