އެމެރިކާގެ ކެލިފޯނިޔާ ސްޓޭޓްގައި ރޯވެފައިވާ އަލިފާންގަނޑުތައް ކޮންޓުރޯލުނުވެ އަނދަމުން ދާއިރު، އަލިފާން ރޯވުމުގެ ސަބަބުން މަރުވި މީހުންގެ އަދަދު 25 އަށް އަރައިފިއެވެ.
އެންމެ ފަހުން ފެނުނު 14 ހަށިގަނޑު ފެނިފައިވަނީ ކެލިފޯނިޔާގެ އުތުރުގެ އަނދައި ހުލިވެފައިވާ އަވަށެއް ކަމުގައިވާ ޕެރެޑައިސްއިންނެވެ. ދެކުނުގެ މަލިބޫ ކައިރިންވެސް ދެ މީހުން މަރުވެފައި ވެއެވެ. އެދެމީހުން ހަށިގަނޑު ފެނިފައިވަނީ ރަށުތެރޭގެ މަގެއްގައި އަނދާފައި އޮތް ކާރެއްގެ ތެރެއިންނެވެ.
އެ ސްޓޭޓުގައި މިހާރު އަނދަމުންދާ ބޮޑު ތިން އަލިފާންގަނޑުން ސަލާމަތްވުމަށް 2 ލައްކަ 50 ހާހެއްހާ މީހުން ވަނީ ގެދޮރު ދޫކޮށް ގޮސްފައެވެ.
ރައްކާތެރިކަމުގެ ފިޔަވަޅެއްގެ ގޮތުން ފުލުހުންގެ އެންގުމަށް ކެލިފޯނިޔާގެ ދެކުނުގައި އޮންނަ މަލިބޫއިން ގެތައް ދޫކޮށް ނުކުތް މީހުންގެ ތެރޭގައި ލޭޑީ ގާގާ، ކިމް ކަރޑާޝިއަން ވެސްޓް، ގިލެރްމޯ ޑެލް ޓޯރޯ އަދި މާޓިން ޝީން ފަދަ ތަރިން ހިމެނެއެވެ. މަލިބޫއަކީ ހޮލީވުޑްގެ ގިނަ ތަރިންތަކެއް ދިރިއުޅޭ ރަށެކެވެ.
އަނެއްކޮޅުން، އަލިފާން ރޯވާން ދިމާވަނީ ޖަންގަލިތައް ބެލެހެއްޓުން ދޯދިޔާވުމުގެ ސަބަބުންކަމަށް ރައީސު ޑޮނާލްޑް ޓްރަމްޕް ވިދާޅުވިމާ ގުޅިގެން ގިނަ ބަޔަކު ދަނީ ނުރުހުން ފާޅުކުރަމުންނެވެ.
ބަޓް ކައުންޓީގައި އަލިފާންގަނޑެއް ކޮންޓުރޯލުނުވެ އަނދަން ފެށީ ފާއިތުވި ބުރާސްފަތި ދުވަހުއެވެ. އަލިފާންނިވާ މީހުންނަށް އެ އަލިފާންގަނޑު ކޮންޓުރޯލުނުވެ ޕެރެޑައިސް އަވަށް ވަނީ އަނދާ ހުލިވެފައެވެ. އެރަށުގެ 45 ހާސް ހެޚްޓަރު އަނދައިގެން ގޮސްފައިވާއިރު، 6700 ގެއާއި ވިޔަފާރިކުރާ ތަންތަން ވަނީ އަނދާ ހުލިވެފައެވެ.
އެހެން އިލިފާންގަނޑެއް ދެކުނުގެ ރިސޯޓު އަވަށެއް ކަމުގައިވާ މަލިބޫގައި ރޯވެފައިވާއިރު އެ އަލިފާންގަނޑު މިހާރު ވަނީ ދެގުނަ ބޮޑުވެފައެވެ.
އަލިފާން ރޯވުމުގެ ސަބަބުން ހުސްކުރަން ޖެހިފައިވާ އަވަށްތަކުގެ ތެރޭގައި ފާއިތުވި ބުދަ ދުވަހު މީހަކު ބަޑިޖަހައިގެން 12 މީހުން މަރުވި އަވަށް، ތައުޒަންޑް އޯކްސްވެސް ހިމެނެއެވެ.
