ރައީސް މުންތަޚަބު އިބްރާހީމް މުޙައްމަދު ޞާލިޙަށް މަރުޙަބާ ދެންނެވުމުގެ ގޮތުން ގެންސްޓްހައުސް އެސޯސިއޭޝަންގެ ފަރާތުން ޚާއްސަ ޙަފްލާއެއް ބާއްވާ ގޮތަށް ނިންމަވައިފިއެވެ.
މި ޙަފްލާ އޮންނާނީ ހުޅުމާލޭ ރެހެންދި ސްކޫލުގައި މިރޭ 7:45 އިން 9:00 އަށެވެ. މި ރަސްމިއްޔާތުގައި ރައީސް މުޙައްމަދު ނަޝީދު ވެސް ބައިވެރިވެ ވަޑައިގަންނަނަވާނެ އެވެ.
ރައީސް ކަމަށް އިބްރާހީމް މުޙައްމަދު ޞާލިޙު އިންތިޚާބުވެ ވަޑައިގެންނެވުމުން އެމަނިކުފާނަށް މަރުޙަބާ ދެންނެވުމުގެ ޙަރަކާތްތައް މާލޭގެ އަވަށްތަކުންނާއި ބައެއް ދާއިރާތަކުންނާއި ޖަމްޢިއްޔާ ޖަމާޢަތްތަކުން ގެންދަވަނީ ބާއްވަމުންނެވެ. މިޙަރަކާތްތަކުގައި އެމަނިކުފާނުގެ އިތުރަށް އިންތިޚާބީ ނާއިބު ރައީސް ފައިޞަލް ނަސީމް ވެސް ބައިވެރިވެ ވަޑައިގަންނަވައެވެ.
އިބްރާހީމް މުޙައްމަދު ޞާލިޙު ވަނީ އިންތިޚާބު ކާމިޔާބު ކުރެއްވުމަށްފަހު ޢުމްރާ ދަތުރުފުޅެއްގައި ސަޢުދީ ޢަރަބިއްޔާއަށް ވެސް ވަޑައިގެންފައެވެ. ޢުމްރާ ދަތުރުފުޅަށް ފަހު އެމަނިކުފާނު ރާއްޖެ ވަޑައިގެންނެވީ ރޭގެ ވަގުތެއްގައެވެ. މިދަތުރުފުޅުގައި އެމަނިކުފާނުވަނީ ސަޢުދީ ސަރުކާރުގެ އިސްބޭފުޅުންނާ ބައްދަލު ކުރައްވައިފައެވެ.
ޢުމްރާ ދަތުރުފުޅުގައި އެމަނިކުފާނުގެ އަނބިކަނބަލުން ފަޒްނާ އަޙުމަދާއި، ރައްޔިތުންގެ މަޖިލީހުގެ ރައީސް ޤާސިމް އިބްރާހީމާއި، ޢަދާލަތު ޕާޓީގެ ނާއިބު ރައީސް ޢަލީ ޒާހިރު ބައިވެރިވެ ވަޑައިގެންނެވިއެވެ.
