އިންތިޚާބީ ރައީސް އިބްރާހިމް މުޙަންމަދު ސޯލިޙް (އިބޫ) އުމްރާއެއް ކުރެއްވުމަށް ސައުދީ އަރަބިއްޔާއަށް ކުރެއްވި ދަތުރުފުޅަށް ފަހު ރޭގެވަގުތެއްގައި ރާއްޖެ ވަޑައިގެންފިއެވެ.
އިންތިޚާބީ ރައީސް އުމްރާއެއް ކުރެއްވުމަށް ސައުދީއަށް ވަޑައިގެންނެވި ދަތުރުފުޅުގައި އެމަނިކުފާނު ވަނީ ސައުދީ ސަރުކާރުގެ ބަޔެއް އޮފިޝަލުންނާވެސް ބައްދަލު ކުރައްވާފައެވެ. އިބޫގެ މިދަތުރުފުޅުގައި ކޯލިޝަނުގައި ހިމެނޭ ޕާޓީތަކުގެ އިސްބަޔެއް ބޭފުޅުންވެސް ބައިވެރިވެވަޑައިގެންނެވިއެވެ. އޭގެތެރޭގައި ޖުމްހޫރީ ޕާޓީގެ ލީޑަރ ގާސިމް އިބްރާހިމް އާއި އަދާލަތު ޕާޓީގެ ނައިބު ރައީސް ޝައިޚް އަލީ ޒާހިރުގެ އިތުރުން ކުރީގެ ރައީސް މައުމޫނުގެ ޓީމުގައި ހިމެނޭ ބޭފުޅުންނާއި އެމްޑީޕީގެ ބަޔެއް އިސްބޭފުޅުންވެސް ހިމެނެއެވެ.
އުމްރާ ދަތުރުފުޅު ނިންމާލެއްވުމަށް ފަހު އިބޫ ރާއްޖެ ވަޑައިގެން މިމަހުގެ 17 ވަނަ ދުވަހު ހުވާ ކުރެއްވުމުގެ ރަސްމިއްޔާތުގެ ކުރިން ކެބިނެޓް އެކުލަވާލެއްވުމުގެ މަސައްކަތުގައި އުޅުއްވާނެ ކަމަށް އިބޫގެ އަރިސް ބޭފުޅަކު މައުލޫމާތު ދެއްވިއެވެ.
