ފޮރިން މިނިސްޓްރީގައި މަސައްކަތް ކުރައްވާ އަންހެން މުވައްޒަފުންތަކަކަށް ޖިންސީ ފުރައްސާރަ ކުރެއްވި ކަމުގެ ތުހުމަތު ފޮރިން މިނިސްޓަރު ޑރ. މުޙައްމަދު ޢާޞިމަށް ކުރެވިފައިވާ މިދަނޑިވަޅުގައި އެންމެ ކުޑަމިނުން އޮފީހަށް ނުކުމެ ވަޑައި ނުގެންނެވުމަށް ރާއްޖެއިން އިންޑިއާއަށް ކަނޑައަޅުއްވާފައި ހުންނަވާ ސަފީރު އަޙުމަދު މުޙައްމަދު ފޮރިން މިނިސްޓަރުގެ އަރިހުން އެދިވަޑައިގެންފިއެވެ.
އަޙުމަދު ކުރައްވައިފައިވާ ޓްވީޓެއްގައި ވިދާޅުވެފައިވަނީ އެފަދަ ތުހުމަތެއް މިނިސްޓަރަށް ކުރާއިރު އެއިން ބަރިއްޔަ ވުމަށް އެންމެ ކުޑަމިނުން ބަޔާނެއް ނެރެދެއްވުމަށެވެ.
ރާއްޖެއިން ސްރީލަންކާއަށް ކަނޑައަޅުއްވާފައި ހުންނަވާ ސަފީރު އަދި ޕީޕީއެމްގެ ސެކްރެޓަރީ ޖެނެރަލް މުޙައްމަދު ޙުސައިން ޝަރީފް (މުންދު) މި ކަމާބެހޭ ގޮތުން ވިދާޅުވެފައިވަނީ އެންމެ ރަނގަޅު ގޮތަކީ މިނިސްޓަރު އިސްތިއުފާ ދެއްވުން ކަމަށެވެ. އެފަދަ ސީރިއަސް ތުހުމަތުތަކެއް މިނިސްޓަރަށް ކުރައްވަމުން ގެންދަވާއިރު އެމަނިކުފާނުގެ ދިފާޢުގައި އަދި އެއްވެސް އެއްޗެއް ވިދާޅުވެފައެއް ނުވެއެވެ.
މުންދުގެ މިވާހަކަފުޅަށް އަޙުމަދު މުޙައްމަދުގެ ޓްވީޓުގައިވަނީ ތާއިދު ކުރައްވައިފައެވެ. "އަދަބު އިޙުތިރާމާއެކު ދަންނަވަން. މުންދުގެ ގޮވައިލެއްވުމަށް އަޅުގަނޑު ފުރިހަމައަށް ތާއިދުކުރަން. އެންމެ ކުޑަމިނުން މިނިސްޓަރު އޮފީހަށް ނުނިކުންނެވުން އެދެން. އަދި ތުހުމަތުތަކުން ބަރިއްޔަ ވުމަށްޓަކައި ބަޔާނެއް ދެއްވުން ވެސް އެދެން،" މުންދުގެ ޓްވީޓަށް ތާއިދު ކުރައްވައި އަޙުމަދު ކުރެއްވި ޓްވީޓުގައި ވިދާޅުވެފައިވެއެވެ.
ފޮރިން މިނިސްޓަރަކީ ބޭރުގައި ރާއްޖެ ތަމްސީލް ކުރައްވާ ވަޒީރެވެ. އެމަނިކުފާނުގެ މައްޗަށް ޖިންސީގޯނާ ކުރުމުގެ ތުހުމަތު ކުރެވުމަކީ ލަދުވެތި ކަމެއް ކަމަށް މުންދު ވިދާޅުވެފައިވެއެވެ.
ފޮރިން މިނިސްޓްރީން މިހާރު ގެންދަވަނީ މިމައްސަލަ ބައްލަވަމުންނެވެ. އެހެންނަމަވެސް މިފަދަ ސީރިއަސް ތުހުމަތެއް ކުރެވެނީ މިނިސްޓަރަށް ކަމެއް އެތަނުން ވިދާޅުވެފައެއް ނުވެއެވެ. އެތަނުން ވިދާޅުވަމުން ގެންދަވަނީ އިސް ވެރިއެއް ކަމަށެވެ. އެތުހުމަތު ކުރެވެނީ މިނިސްޓަރަށް ކަމަށް ވިދާޅުވެ އެކަން ހާމަކުރެއްވީ މުންދުއެވެ.
