އަފްޣާނިސްތާނު ސަރުކާރާއި، ޠާލިބާނުންނާ ދެމެދު ސުލްހައިގެ ސީދާ ވާހަކަތައް ފެށުމަށް މަގުފަހިކުރުމަށްޓަކައި ބާއްވާ ބައްދަލުވުން މޮސްކޯގައި ފެށިއްޖެއެވެ. ޠާލިބާނުން ވަނީ މި ބައްދަލުވުމަށް މަންދޫބުން ފޮނުވާފައެވެ. ސުލްހައިގެ ވާހަކަތައް ބާއްވަން ޖެހެނީ އަފްޣާނިސްތާނު ސަރުކާރުގެ ބެލުމުމުގެ ދަށުގައިކަަމަށް ވިދާޅުވެ ރައީސު އަޝްރަފު ޣަނީ ވަނީ މޮސްކޯގެ ވަފުދެއް ފޮނުއްވުމަށް ދެކޮޅު ހައްދަވާފައެވެ. އަފްޣާނިސްތާނުގެ ފަރާތުން ބައިވެރިވަނީ ކުރީގެ ރައީސު ހާމިދު ކަރްޒާއީ އުފައްދަވާފައިވާ އަފްޣާން ހައި ޕީސް ކައުންސިލްގެ ވަފުދެކެވެ.
ބައްދަލުވުން ފަށްޓަވަމުން ރަޝިޔާގެ ޚާރިޖީ ވަޒީރު ސަރްގޭ ލަވްރޯފް ވިދާޅުވި ގޮތުގައި ރަޝިޔާއިން އުއްމީދުުކުރަނީ "ގުޅިގެން ކުރެވޭ މަސައްކަތުން އަފްޣާނިސްތާނުގެ ތާރީޚުގައި އައު ސަފުހާއެއް" ހުޅުވުމަށެވެ.
މި ބައްދަލުވުމަށް ރަޝިޔާއިން ވަނީ ޕާކިސްތާން، އިންޑިޔާ، އެމެރިކާ، ޗައިނާ، އީރާނުގެ އިތުރަށް ކުރީގެ ރޫސީވިލާތް ރޫޅިގެން މިނިވަންވި ފަސް މުސްލިމް ގައުމު ކަމުގައިވާ ކަޒަކިސްތާން، ކިރްގިޒްތާން، ތަޖިކިސްތާން، ތުރްކުމާނިސްތާން އަދި އުޒްބަކިސްތާނަށް ދައުވަތުދީފައެވެ.
މީގެ ކުރިން ޠާލިބާނުންނާ ވާހަކަދެއްކުމަށް ދެކޮޅު ހަދަމުން އައިސްފައިވާ އިންޑިޔާއިންވެސް މިފަހަރު ވަނީ މި ބައްދަލުވުމަށް ވަފުދެއް ފޮނުވާފައެވެ. "ނުރަސްމީ ހައިސިއްޔަތުން" ދިޔަ އެ ވަފުދުގައި ހިމެނިވަޑައިގަންނަވަނީ އަފްޣާނިސްތާނާއި ޕާކިސްތާނުގައި ކުރިން އިންޑިޔާގެ ސަފީރު އަމަރް ސިންހާއާއި، އަފްޣާނިސްތާނުގައި ހުންނެވި ސަފީރު ޓީސީއޭ ރަގަވަންއެވެ.
ޠާލިބާނުންވެސް ވަނީ މި ބައްދަލުުވުމަށް މަތީ ފެންވަރުގެ ވަފުދެއް ފޮނުވާފައެވެ. ފަސް މެންބަރުންގެ މައްޗަށް އެކުލެވޭ ވަފުދުގެ އިސް ވެރިއަކަށް ހުރީ ސިޔާސީ ކައުންސިލްގެ ވެރިޔާ ޝޭރް މުޙައްމަދު ޢައްބާސް އިސްތާނާކްޒާއީއެވެ.
ރަޝިޔާއިން ފާހަގަކުރި ގޮތުގައި މިއީ އަފްޣާނިސްތާނުގެ ސުލްހައާއި ބެހޭގޮތުން ބާއްވާ ބައްދަލުުވުމެއްގައި ޠާލިބާން ވަފުދެއް ބައިވެރިވާ ފުރަތަމަ ފަހަރެވެ.
ޠާލިބާން ޖަމާއަތުން ނެރުނު ބަޔާނެެއްގައި އެ ޖަމާއަތުން ބުނިގޮތުގައި ބައްދަލުވުމަށް ވަފުދެއް ފޮނުވީ މުސްތަގުބަލުގައި ކުރިއަށް ދާނެ ސުލްހައިގެ ވާހަކަތަކަށް އެ ޖަމާއަތުން ހުށަހަޅަން ބޭނުންވާ ކަންކަން ހުށަހެޅުމަށެވެ. އޭގެތެރޭގައި އެމެރިކާ ސިފައިން އަފްޣާނިސްތާނުން ފޭބުންވެސް ހިމެނެއެވެ.
