ރާއްޖޭގެ ކުރީގެ ރައީސުލްޖުމްހޫރިއްޔާ އަދި އެމްޑީޕީގެ ރައީސް މުޙައްމަދު ނަޝީދު އައްޑޫސިޓީ އަށް ކުރެއްވި ދަތުރުފުޅު ނިންމަވާ ލެއްވުމަށްފަހު މިރޭ ފުރައި ވަޑައިގެންފިއެވެ.
ގަންއިންޓަރނޭޝަނަލް އެއާޕޯޓުން އެމަނިކުފާނަށް އަލްވަދާޢު ދެންނެވީ އައްޑޫސިޓީގެ މޭޔަރާއި ސިޓީކައުންސިލްގެ މެމްބަރުންނާއި، އައްޑޫސިޓީގައި ތިއްބެވި އެމްޑީޕީގެ އިސް ބޭފުޅުންނެވެ. އޭގެ އިތުރަށް އެމަނިކުފާނަށް އަލްވަދާޢު ދެންނެވުމަށް ގިނަޢަދަދެއްގެ ސަޕޯޓަރުން ވެސް އެއާޕޯޓަށް ދިޔައެވެ.
އައްޑޫއެމަނިކުފާނު އައްޑޫސިޓީއަށް ވަޑައިގެންނެވީ އަންގާރަ ދުވަހުއެވެ. މިދަތުރުފުޅުގައި އެމަނިކުފާނު ވަނީ އައްޑޫ ސިޓީ ހިތަދޫގައި އެމަނުކުފާނުގެ އޮފީހެއް ހުޅުއްވައިދެއްވައިފައެވެ. އެއޮފީހުގެ މަސައްކަތްތައް ޚާއްސަކުރައްވާނީ ތިމާވެށީގެ ދާއިރާއަށް ކަމަށް ވެސް އެމަނިކުފާނު ވަނީ ވިދާޅުވެފައެވެ.
ރައީސް ނަޝީދު ވަނީ އައްޑޫގެ ހުރިހާ އަވަށަކަށް ވަޑައިގެން އެމަނިކުފާނުގެ ސަޕޯޓަރުންނާ ބައްދަލު ކުރައްވައިފައެވެ. އަދި އެމަނިކުފާނުވަނީ އައްޑޫ ސިޓީކައުންސިލަށް ވަޑައިގެން އެތަނުގެ މުވައްޒަފުންނާވެސް ބައްދަލު ކުރައްވައިފައެވެ. އޭގެ އިތުރަށް މޭޔަރާ ވެސް ވަނީ ބައްދަލު ކުރައްވައިފައެވެ.
ރައީސް ނަޝީދު މާލެ ވަޑައިގެންނެވުމަށްފަހު ދެން އެންމެ އަވަހަށް ވަޑައިގަންނަވަނީ ހއ. ދިއްދުއަށް ކަމަށް އެމްޑީޕީން ވަނީ ބުނެފައެވެ. އެދަތުރުފުޅުގައި އެއަތޮޅުގެ ބައެއް ރަށްރަށަށް ވަޑައިގެންނެވުމަށް ވަނީ ހަމަޖެހިފައެވެ.
