ރާއްޖޭގެ ކުރީގެ ރައީސުލްޖުމްހޫރިއްޔާ އަދި އެމްޑީޕީގެ ރައީސް މުޙައްމަދު ނަޝީދު އައްޑޫސިޓީ މޭޔަރު ޢަބްދުﷲ ޞާދިގާ މިއަދު ބައްދަލު ކުރައްވައިފިއެވެ.
މި ބައްދަލު ކުރެއްވުންއޮތީ ހިތަދޫގައި އިއްޔެ ހުޅުވި ރައީސް ނަޝީދުގެ އޮފީހުގައެވެ. މި ބައްދަލު ކުރެއްވުމުގައި ރައްޔިތުންގެ މަޖިލީހުގެ ހިތަދޫ އުތުރުދާއިރާގެ މެމްބަރު މުޙައްމަދު އަސްލަމާއި ޖަރީޒާ ރާއްޖޭގެ އައްޑޫސިޓީގެ ކެމްޕޭން މެނޭޖަރު ޤައިސް ނަސީރު ބައިވެރިވެ ވަޑައިގެންނެވިއެވެ.
ރައީސް ނަޝީދު އައްޑޫ ސިޓީއަށް މިހާރު ކުރައްވަމުން ގެންދަވާ ދަތުރުފުޅަށްފަހު އެނބުރި މާލެ ވަޑައިގަންނަވަނީ މިއަދު ހަވީރުއެވެ. އެމަނިކުފާނުގެ މިދަތުރުފުޅުގައިވަނީ އައްޑޫސިޓީގެ ހުރިހާ ރަށަކަށް ވަޑައިގެން ރައްޔިތުންނާ ބައްދަލު ކުރައްވައިފައެވެ.
ރައީސް ނަޝީދު މާލެ ވަޑައިގެންނެވުމަށްފަހު ދެން އެންމެ އަވަހަށް ވަޑައިގަންނަނީ ވާނީ ހއ. ދިއްދުއަށް ކަމަށް އެމްޑީޕީން ވަނީ ބުނެފައެވެ. އެދަތުރުފުޅުގައި އެއަތޮޅުގެ ބައެއް ރަށްރަށަށް ވަޑައިގެންނެވުމަށް ވަނީ ހަމަޖެހިފައެވެ.
