މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ހުޅުމީދޫގައި ތަރައްގީކޮށް ހުޅުވައިފައިވާ "އައްޑޫ ފިޝަރީޒް ކޮމްޕްލެކްސް" އަށް ވަންނަން އޮންނަ ނެރު ފުންކޮށް ދެއްވުމަށް އެދި ކަމާބެހޭ ފަރާތްތަކަށް ހުށަހަޅައިފައިވާނެ ކަމަށް މިފްކޯއިން ވިދާޅުވެއްޖެއެވެ.
އެތަނަށް ވަންނަން އޮންނަ ނެރު ހަދައިފައި ނުވާތީ މަސް ކިރަން އަންނަ މަސްވެރިންނަށް ވަރަށް ބޮޑަށް ދަތިވަމުންދެއެވެ.
މިފްކޯގެ ސީއީއޯ ޢަދުލީ އިސްމާޢީލް ވިދާޅުވީ އައްޑޫ ފިޝަރީޒް ކޮމްޕްލެކްސް އަށް ހމިހާރުވެސް މަސްގަންނަމުންދާ ކަމަށެވެ. އެހެންނަމަވެސް މަސްވެރިކަމުގައި މިހާރު ބޭނުންކުރާ ބޮޑެތި އުޅަނދުފަހަރަށް އެތަނަށް ވަދެނުކުތުމަށް ވަރަށް ބޮޑަށްވަނީ ދަތިވެފައެވެ.
މިފްކޯއިން ހުޅުމީދޫގައި އެތަން ހަދަން ފެށުމާއެކު އުފެދިގެންދިޔަ އެންމެބޮޑު އެއް ސުވާލަކީ އެތަނަށް ވަދެނުކުތުމަށް ޙައްލުގެނައުމާ ބެހޭގޮތުންނެވެ. އެދުވަސްވަރު ޢަދުލީ ވިދާޅުވީ ފިޝަރީޒް ކޮމްޕްލެކްސް އެޅުމަކީ މިފްކޯގެ ކަމެއްކަމަށެވެ. ފަޅުފުންކުރުމާއި ނެރުހެދުން ވެސް އެކަމާ ގުޅޭފަރާތްތަކުން ކުރައްވާނެ ކަމަށް އޭރު އޭނާ ވިދާޅުވިއެވެ. ތަންނިމި ހުޅުވައި ޚިދުމަތްދޭން ފެށިއިރު ވެސް އެ ބަނދަރަށް ވަންނަން އެކަށީގެންވާ ނެރެއް ހެދިފައެއް ނުވެއެވެ.
އައްޑޫ ފިޝަރީޒް ކޮންޕްލެކްސް އަކީ ހަތް މިލިއަން ޑޮލަރު ޚަރަދުކޮށްގެން ހަދައިފައިވާ ތަނެކެވެ. އެތަނުގައި 1،500 ޓަނުގެ ކޯލްޑް ސްޓޯރޭޖް ފެސިލިޓިއެއް ހުންނާނެއެވެ. އަދި ދުވާލަކު 100 ޓަނުގެ މަސް ގަނޑުކުރެވޭނެއެވެ. އެތަނުގައި 50 ޓަނުގެ އައިސް ޕްލާންޓަކާއި 200 ޓަނުގެ ތެލާއި 250 ޓަނުގެ ފެން އެއްފަހަރާ ރައްކާ ކުރެވޭނެއެވެ.
