ޕްރައިމަރީ އާއި ރައްޔިތުންގެ ސީދާ ވޯޓަކީ ދޭއެއްޗެއް ކަމަށާއި އެ ދޭތި އޮޅުވާނުލުމަށް ރައްޔިތުންގެ މަޖިލީހުގެ ކުރިޔަށް އޮތް ދައުރުގައި މަޖިލީހަށް ކުރިމަތިލުމަށް ކޯލިޝަނުގެ ޓިކެޓް ޕްރައިމަރީއަކާ ނުލައި ދެއްވަން ނިންމާފައިވާ 12 މެމްބަރުންގެ ތެރޭގައި ހިމެނޭ ތިނަދޫ އުތުރު ދާއިރާގެ މެމްބަރު ސައުދުﷲ ޙިލްމީ ވިދާޅުވެއްޖެއެވެ.
ޕްރައިމަރީއަކާ ނުލައި 12 މެމްބަރުންނަށް ކޯލިޝަނުގެ ޓިކެޓް ދިނުމަށް ލީޑަރުން ނިންމާފައިވާތީ އެކަމަށް އާންމުން ކިޔަމުން އަންނަ ފާޑުކިޔުންތަކަށް ރައްދު ދެއްވައި ސައުދުﷲ މިއަދު ކުރެއްވި ޓްވީޓެއްގައި ވިދާޅުވީ ކުރީގެ ރައީސް މުޙަންމަދު ނަޝީދުވެސް މީގެކުރިން ރިޔާސީ އިންތިޚާބުގެ ޓިކެޓް ޕްރައިމަރީއަކާ ނުލައް ދީފައިވާ ކަމަށެވެ. އަދި އޭގެފަހުން މިފަހަރު އިބްރާހިމް މުޙަންމަދު ސޯލިޙްއަށް ރިޔާސީ ޓިކެޓް އެމްޑީޕީން ދިނީވެސް ޕްރައިމަރީއަކާ ނުލައިކަން ސައުދުﷲ ފާހަގަ ކުރެއްވިއެވެ.
"އިބޫއަށް ކެންޑިޑޭޓްކަން ދިނީ އާންމު މެމްބަރުންގެ ޕްރައިމަރީއަކުން ނޫން، އިބޫ ހޮވުނީ ޕްރައިމަރީއެއް ނެތި ރައްޔިތުންގެ ވޯޓަކުން" ސައުދުﷲ ވިދާޅުވިއެވެ.
އޭނާ ވިދާޅުވީ ޕްރައިމަރީއަކާ ނުލައި ކުރިޔަށް އޮތް މަޖިލީހުގެ އިންތިޚާބުގެ ޓިކެޓް ދިނުމަށް ކޯލިޝަނުގެ ލީޑަރުން ނިންމާފައިވާ 12 މެމްބަރުންގެ ކިބައިގައިވެސް ރައްޔިތުންގެ ވޯޓާ ކުރިމަތި ލުމުގެ ހިތްވަރު އެބަހުރި ކަމަށެވެ.
ސައުދުﷲ މިހެން ވިދާޅުވިއިރު 12 މެމްބަރުންގެ ތެރޭގައި ހިމެނޭ ތިމަރަފުށީ ދާއިރާގެ މެމްބަރު މުޙަންމަދު މުސްތޮފާ ވިދާޅުވީ ޕްރައިމަރީއާ ކުރިމަތި ލެއްވުމުގެ ހިތްވަރުވެސް އެބަހުރި ކަމަށާއި ޕްރައިމަރީއަށް ނުކުންނަވާނީވެސް އެމްޑީޕީގެ ޓިކެޓު ހޯދުމަށް ކަމަށެވެ. އަދި ޕްރައިމަރީވެސް ކާމިޔާބު ކުރައްވާނެ ކަމަށް މުސްތޮފާ ވިދާޅުވިއެވެ.
