އިންތިޚާބީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު (އިބޫ) ޢުމްރާ ދަތުރުފުޅެއްގައި ސަޢުދީޢަރަބިއްޔާއަށް މިއަދު ފުރައިވަޑައިގެންފިއެވެ.
އެމަނިކުފާނުގެ އަރިހުގައި އަނބިކަނބަލުން ފަޒުނާ އަޙުމަދާއި، ރައްޔިތުންގެ މަޖިލީހުގެ ރައީސް އަދި ޖުމްހޫރީޕާޓީގެ ލީޑަރު ޤާސިމް އިބްރާހީމާއި ޢަދާލަތުޕާޓީގެ ނާއިބު ރައީސް ޢަލީ ޒާހިރުވެސް ޢުމްރާއަށް ފުރައިވަޑައިގެންނެވިއެވެ. އަދި އެމްޑީޕީގެ އިސް ބައެއް ބޭފުޅުންް ވެސް ވަޑައިގެންނެވިއެވެ.
މިދަތުރުފުޅުގައި ސަޢުދީޢަރަބިއްޔާގެ އިސްބޭފުޅުންނާ އިބްރާހީމް މުޙައްމަދު ޞާލިޙު ބައްދަލު ކުރައްވާގޮތަށް ވަނީ ހަމަޖެހިފައެވެ.
އެމްޑީޕީގެ ރައީސް އަދި ރާއްޖޭގެ ކުރީގެ ރައީސް މުޙައްމަދު ނަޝީދު ވެސް ވަނީ ސަޢުދީ ރަސްގެފާނުގެ ދަޢުވަތަކަށް ވަރަށް ފަހުން އެޤައުމަށް ވަޑައިގެންފައެވެ.
ހުވައި ކުރެއްވުމުގެ ކުރިން އިބްރާހީމް މުޙައްމަދު ޞާލިޙު ޢުމްރާއަށް ވަޑައިގެންނެވުމުން އެކަން ފާހަގަ ކުރައްވައި ބައެއް ޢިލްމުވެރިން ވިދާޅުވެފައިވަނީ އެއީ އެމަނިކުފާނުގެ ފަރާތްޕުޅުން ފެނުނު ރަނގަޅު ސިފައެއް ކަމަށެވެ. ޢުމްރާ ދަތުރުފުޅަށްފަހު އިބްރާހީމް މުޙައްމަދު ޞާލިޙު ރާއްޖެ ވަޑައިގަންނަވާނީ އަންނަ ހުކުރު ދުވަހު އެވެ.
