ދިވެހި ރާއްޖެއަށް ކުރިމަތިވި އެންމެ ބޮޑު މުސީބާތަކީ ރައްޔިތުންގެ މަޖިލީހުގެ މެމްބަރުންގެ ތެރޭގައި ޚިޔާނާތްތެރިން ގިނަވުން ކަމަށް ކުރީގެ އޮޑިޓަރ ޖެނެރަލް ނިޔާޒް އިބްރާހިމް ވިދާޅުވެއްޖެއެވެ.
މަޖިލީހުގެ 12 މެމްބަރުންގެ ޓިކެޓް ޕްރައިމަރީއަކާނުލައި ދިނުމަށް ކޯލިޝަނުގެ ލީޑަރުން އެއްބަސްވެވަޑައި ގެންފައިވާ ކަމަށް ދެކެވޭ ވާހަކަތަކާއި ގުޅިގެން އެކަމަށް ތަކުރާރުކޮށް ފާޑުވިދާޅުވަމުން އަންނަ ނިޔާޒް ވިދާޅުވީ ރައްޔިތުންގެ މަޖިލިސް ސާފު ކުރަންޖެހިފައިވާ ކަމަށެވެ.
ނިޔާޒް ވިދާޅުވީ ފާއިތުވީ ފަސް އަހަރުވެސް ރާއްޖެއަށް ކުރިމަތިވި އެންމެ ބޮޑު މުސީބާތަކީ ޚިޔާނާތްތެރި މެމްބަރުންތަކެއް މަޖިލީހުގައި ތިއްބެވުން ކަމަށެވެ. އަދި އޭނާ ދައްކާ ވާހަކަފުޅުތަކާ ބަޔަކު ކިތަންމެ ނުރުހުނަސް އޭނާގެ ޚިޔާލާއި ފިކުރު ދުލާއި ގަލަމުން އަދި އެހެނިހެން ވަސީލަތްތަކުންވެސް ފާޅު ކުރައްވާނެ ކަމަށް ނިޔާޒް ވިދާޅުވިއެވެ.
12 މެމްބަރުންނަށް ޕްރައިމަރީއަކާ ނުލައި ޓިކެޓް ދޭން ނިންމާފައިވާ ކަމަށް ބަޔެއް ލީޑަރުން ވިދާޅުވުމާއެކު ނިޔާޒްގެ ފާޑު ވިދާޅުވުން އެ 12 މެމްބަރުންނަށް ވަރަށް ބޮޑަށް އަމާޒު ވެގެންދިޔައެވެ. ނިޔާޒް ވިދާޅުވީ ރައީސް ޔާމީންގެ އަނިޔާވެރިކަން ފަށައިގަނެވުނީ އެ 12 މެމްބަރުންގެވެސް އެއްބާރުލެއްވުމާއެކު ކަމަށެވެ.
12 މެމްބަރުންވެސް ވަނީ ނިޔާޒަށް ފާޑު ވިދާޅުވެފައެވެ. އެ މެމްބަރުން ވިދާޅުވެފައި ވަނީ ގައުމުގައި ނެތްވަރުގެ ނަޒާހަތްތެރި ބޭފުޅަކަށް ނިޔާޒް ވެވަޑައިގެން އުޅުއްވަން ނޫޅުއްވުމަށާއި އަދި އަނިޔާވެރިކަމާ ދެކޮޅަށް ގައުމުގައި ހުންނަވައިގެން މަސައްކަތް ކުރައްވަން ނިޔާޒަށް ކެރިވަޑައިނުގެން ގައުމުން ބޭރަށް ވަޑައިގެންނެވީ ކަމަށެވެ.