ރާއްޖޭގެ ސިޔާސީ މަރަހު ބަދަލުވެގެން ދިޔައީ ރައްޔިތުންގެ މަޖިލީހުގެ މެމްބަރު ކަމުން ވަކިކުރި 12 މެމްބަރުންގެ ސަބަބުން ކަމަށް އެ މެމްބަރުންގެ ތެރޭގައި ހެމެނުނު ތިމަރަފުށީ ދާއިރާގެ މެމްބަރު މުޙައްމަދު މުސްތަފާ ވިދާޅުވެއްޖެއެވެ.
އެ މެމްބަރުންގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ނިންމަވައިފައިވަނިކޮށް ސްޕްރީމް ކޯޓުން ވަނީ އެ މައްސަލަ ބެއްލެވުމަށްފަހު އެބޭފުޅުންގެ ގޮނޑިތައް ނުގެއްލޭ ކަމަށް ޙުކުމް ކުރައްވައި ގޮޑިތައް އިޔާދަ ކޮށްދެއްވައިފިއެވެ. އެ ގޮނޑިތައް އަލުން ކަށަވަރު ކޮށްދެއްވިއިރު މަޖިލީހުގެ ޖަލްސާއަކަށް ނުވަދެވި 13 މަސް ވަނީ ފާއިތުވެގެން ގޮސްފައެވެ.
އޭގެ ތެރޭގައި ހިމެނިވަޑައިގެންނެވި މުސްތަފާ ކުރައްވައިފައިވާ ޓްވީޓެއްގައި ވިދާޅުވެފައިވަނީ ސިޔާސީ މަސްރަހު ބަދަލުވީ އެބޭފުޅުންގެ ސަބަބުން ކަމަށް އެއީ އަދުގެ ސިޔާސީ ޙަޤީޤަތް ކަމަށެވެ.
އެހެން ކަމުން އެ މެމްބަރުން ވެވަޑައިގެންނެވި ޤުރުބާނީއާއި ތަޙައްމަލް ކުރެއްވި ވޭނާއި އަނިޔާގެ ވާހަކަ ރައްޔިތުންނަށް އޮޅުން ފިލުވައި ދެއްވުމަކީ ކޯލިޝަންގެ 4 ލީޑަރުން ކޮށްދެއްވަން ޖެހޭ ކަމެއް ކަމަށް ދެކެވަޑައިގަންވާ ކަމަށް އޭނާ ވިދާޅުވެފައިވެއެވެ.
"ސިޔާސީ މުޅި މަސްރަހު ބަދަލުވީ މި ބާރަ މެމްބަރުންގެ ސަބަބުން. މިއަދުގެ ޕޮލިޓިކަލް ރިއަލިޓީއަކީ މިއީ. ބާރަ މެމްބަރުންވި ޤުރުބާނީއާއި، ތަޙައްމަލްކުރި ވޭނާއި، ގެއްލުމާއި އަނިޔާ، ރައްޔިތުންނަށް އޮޅުންފިލުވައި ދެއްވުމަކީ ހަތަރު ލީޑަރުން ކުރައްވަންވާނެ ކަމެއް ކަމަށް އަޅުގަނޑު ދެކެން،" މުސްޠަފާގެ ޓްވީޓުގައި ވިދާޅުވެފައިވެއެވެ.
