ރާއްޖޭގެ ކުރީގެ ރައީސް އަދި އެމްޑީޕީގެ ރައީސް މުޙައްމަދު ނަޝީދު ދާދި ދެންމެއަކު އައްޑުސިޓީއަށް ވަޑައިގެންފިއެވެ.
މިދަތުރުފުޅުގައި އެމަނިކުފާނު އަރިހުގައި އަނބި ކަނބަލުން މެޑަމް ލައިލާ ޢަލީ އާއި، އެމްޑީޕީގެ އިސް ބައެއް ބޭފުޅުން ބައިވެރިވެ ވަޑައިގަންނަވައެވެ.
ރައީސް ނަޝީދުގެ ދެކަނބަލުން ގަންއިންޓަރނޭޝަނަލް އެއާޕޯޓަށް ވަޑައިގެންނެވުމުން މަރުޙަބާ ދެއްނެވީ އައްޑޫސިޓީގެ މޭޔަރު ޢަބްދުﷲ ޞާދިޤާއި، ކައުންސިލަރުންނާއި، އައްޑޫގައި ތިބި އެމްޑީޕީގެ އިސް ބޭފުޅުނާއި ރައީސް ނަޝީދުގެ ސަޕޯޓަރުންނެވެ. ވަރަށްގިނަ ޢަދަދެއްގެ ސަޕޯޓަރުން ވަނީ ރައީސް ނަޝީދަށް މަރުޙަބާ ދެންނެވުމަށް ނުކުމެފައެވެ.
މިއީ އެމަނިކުފާނު ބޭރުގައި ހުންނެވުމަށްފަހު ރާއްޖެ ވަޑައިގެންނެވި ފަހުން އަތޮޅަކަށް ކުރައްވާ މިފަދަ ފުރަތަމަ ދަތުރުފުޅެވެ. މިދަތުރުފުޅުގައި ރައީސް ނަޝީދު އައްޑޫސިޓީގެ ހުރިހާ ރަކަށް ވަޑައިގެންނެވުމަށްވަނީ ހަމަޖެހިފައެވެ. އަދި އެމަނިކުފާނުގެ ސަޕޯޓަރުންނާ ބައްދަލުކުރައްވާ ގޮތަށް ވެސް ހަމަޖެހިފައިވާ ކަމަށް އެމްޑީޕީ އައްޑޫ ދާއިރާއިން މަޢުލޫމާތު ދެއްވިއެވެ.
މިދަތުރުފުޅު ނިންމަވާ ލެއްވުމަށްފަހު އެމަނިކުފާނު އެނބުރި މާލެ ވަޑައިގަންނަވާނީ މިމަހު 8 ވަނަ ދުވަހުއެވެ.
