ކުރީގެ ރައީސް މުޙަންމަދު ނަޝީދުގެ އޮފީހެއް އައްޑޫ ސިޓީގައި މިއަދު ހުޅުވާނެއެވެ.
އެމްޑީޕީން ބުނީ އައްޑޫ ސިޓީ ހިތަދޫގައި ރައީސް ނަޝީދުގެ އޮފީސް މިއަދު ހުޅުވައި ދެއްވާނީވެސް އެމަނިކުފާނު ކަމަށެވެ. މިއީ ކުރީގެ ރައީސެއްގެ އޮފީސް ވެރިރަށް މާލެއިން ބޭރުގައި ހުޅުވާ ފުރަތަމަ ފަހަރެވެ. މި އޮފީސް ހުޅުވުމަށް ފަހު ނަޝީދު އައްޑޫ ސިޓީގެ އޮފީހުގައިވެސް މަސައްކަތް ކުރައްވާނެއެވެ.
ކުރީގެ ރައީސުން އޮފީސް ހިންގެވުމުގެ ޚަރަދަކީ ދައުލަތުންދޭ އެއްޗެކެވެ. އެގޮތުން ރައީސް ނަޝީދުގެ އޮފީހެއް މާލޭގައިވެސް ހުރެއެވެ. އަދި ކުރީގެ ރައީސް މައުމޫންގެ އޮފީހެއްވެސް މާލޭގައި ހުރެއެވެ. ކުރީގެ ރައީސުންގެ އޮފީސް ހިންގެވުމަށް ދަލަތުން ކޮންމެ މަހަކު 87 ހާސް ރުފިޔާ ދެއްވައެވެ.
ރައީސް ނަޝީދުގެ އޮފީހެއް އައްޑޫ ސިޓީގައި ހުޅުވާއިރު އެމަނިކުފާނު ވަރަށްގިނައިން އައްޑޫ ސިޓީއަށް ވަޑައިގަންނަވާނެ ކަމަށް އެމްޑީޕީން ވަނީ ބުނެފައެވެ.
