އިންތިޚާބީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ހުވައި ކުރެއްވުމުގެ ރަސްމިއްޔާތު ވެގެންދާނީ ރާއްޖޭގެ ރައީސަކު ހުވައި ކުރެއްވުމަށް ބާއްވާ އެންމެ ބޮޑު ރަސްމިއްޔާތަށް ކަމަށް އެމްޑީޕީގެ ޗެއާޕާސަން ޙަސަން ލަޠީފް ވިދާޅުވެއްޖެއެވެ.
"މިރަސްމިއްޔާތު ވެގެންދާނީ މިހާތަނަށް ރާއްޖޭގެ ރައީސުލްޖުމްހޫރިއްޔާއަކު ހުވައި ކުރެއްވުމަށް ބޭއްވޭ އެންމެބޮޑު ރަސްމިއްޔާތަށް،" އޭނާ ވިދާޅުވިއެވެ.
އެ ރަސްމިއްޔާތު އޮންނާނީ ނޮވެމްބަރު 17 ވަނަދުވަހު ހަވީރު 5:00 ގައި ގަލޮޅު ބޯޅަދަނޑުގައެވެ. އެތަނުގައި އެރަސްމިއްޔާތު ބޭއްވުމަށް ނިންމެވީ އިންތިޚާބީ ރައީސުލްޖުމްހޫރިއްޔާ އެގޮތަށް ބޭނުންފުޅުވުމުންނެވެ. އެމަނިކުފާނު އެގޮތަށް ނިންމެވީ ވީހާސްވެސް ގިނަ ބަޔަކަށް އެރަސްމިއްޔާތުގައި ބައިވެރިވުމުގެ ފުރުސަތު ދެއްވުމުގެ ގޮތުންނެވެ.
މިރަސްމިއްޔާތަށް މިހާރުވެސް ވަނީ ބޭރުގެ ވަރަށްގިނަ ޢަދަދެއްގެ ބޭފުޅުންނަށް ދަޢުވަތު އަރުވައިފައެވެ. އެބޭފުޅުންނަށް ގަލޮޅު ދަނޑުން ޖާގަ ދެއްވުމަށްފަހު ޢާއްމުކޮށް ހުޅުވާލާ ގޮތަށް ކުރިންވަނީ ނިންމަވައިފިއެވެ. އެހެންނަމަވެސް މިހާރުވަނީ ސަލާމަތީ ސަބަބުތަކަށްޓައި އެކަން ބަދަލުކޮށް ޢާއްމުކޮށް ހުޅުވައިނުލާ ގޮތަށް ނިންމަވައިފައެވެ. "ގަލޮޅު ދަނޑުގެ ޖާގައަކީ އެގާރަހާސް ފަސް ސަތޭކަ. އަޅުގަނޑުމެން ދަޢުވަތު އަރުވަން ވަރަށްދިގު ލިސްޓެއް އެބައޮތް،" ޙަސަން ވިދާޅުވިއެވެ.
އޭނާ ވިދާޅުވީ ރަސްމިއްޔާތުގައި ބައިވެރިވުމުގެ ދަޢުވަތު ބޭރުގެ ދައުލަތްތަކުގެ އެންމެމަތީ ވެރިންނަށް އެބަ ފޮނުއްވާ ކަމަށެވެ.
ޙަސަން ލަޠީފް ވިދާޅުވީ ކުރިން ނިންމަވައިފައިވާ ގޮތަށް މިރަސްމިއްޔާތަށް މީހުން އައުން އާންމުކޮށް ހުޅުވާލި ހުޅުވާލުން ބަދަލުކުރަން ޖެހުނީ ބޭރުން ވަޑައިގަންނަވާ ބޭފުޅުންގެ ސަލާމަތާއި ރައްކާތެރި ކަމަށް ބަލާފައި އެބޭފުޅުންގެ ފަރާތްޕުޅުންނާއި ރާއްޖޭގެ ސަލާމަތީ ކަންކަން ބަލަހައްޓަވާ ފަރާތްތަކުގެ އެދުމުގެ ވެސް މަތިން ކަމަށެވެ. އޭނާ ވިދާޅުވީ އެ ރަސްމިއްޔާތަށް 11500 މީހުންނަށް ދަޢުވަތު ދެއްވުމަށް ވިސްނަވަމުން ގެންދަވާ ކަމަށެވެ. އޭގެ އިތުރަށް މާލޭގެ ދެ ސަރަޙައްދެއްގައި ސްކްރީން ބަހައްޓަވައިގެން އެ ރަސްމިއްޔާތު ބެލޭނެ އިންތިޒާމް ވެސް ހަމަޖައްސަވައި ދެއްވާނެ ކަމަށް ޙަސަން ވިދާޅުވިއެވެ.
