ނިމިގެންދިޔަ ރިޔާސީ އިންތިޚާބާ ބެހޭ އެއްވެސް މައްސަލައެއް ހުށަހެޅުމުގެ އެއްވެސް ފުރުސަތެއް ދެންނެތް ކަމަށާއި، އެހުރިހާ ދޮރެއް މިހާރުވަނީ ބަންދުވެފައި ކަމަށް އިލެކްޝަންސް ކޮމިޝަންގެ ރައީސް އަޙުމަދު ޝަރީފް ވިދާޅުވެއްޖެއެވެ.
އޭނާ މިހެން ވިދާޅުވީ ރިޔާސީ އިންތިޚާބު އެއީ ބާތިލް އެއްޗެއް ކަމަށް ބުނެ ބަޔާން ނެރެދިނުމަށް އެދި އިލެކްޝަންސް ކޮމިޝަންގެ ބައެއް މެމްބަރުންނަށް ގުޅާފައި ބައެއް ފަރާތްތަކުން ބުނަމުންދާ ވަގުތެއްގައެވެ.
"އެގޮތަށް ގުޅާފައި އިންތިޚާބު ސައްޙަ ނޫންކަމަށް ބަޔާން ނެރެދިނުމަށް އެދި ބައެއްފަރާތްތަކުން ގުޅާ ކަމަށް އީސީގެ ހަތަރު މުއައްޒަފަކު ބުނެފައިވޭ. އޭގެ ތެރެއިން އެކަކު އަދިވެސް އެބަހުރިހި އަޅުގަނޑުމެންނާއެކު ދެންތިބީ އިލެކްޝަނަށް ރެކްޓްރޫޓު ކުރި ކުދިންތަކުގެ ތެރެއިން ތިން ކުއްޖެއް. އެކުދިން މިހާރުނެތް،" ޝަރީފް ވިދާޅުވިއެވެ.
ރިޔާސީ އިންތިޚާބުވަނީ މަކަރުހަދައި އޮޅުވާލައިފައި ކަމަށް ވިދާޅުވެ އިންތިޚާބު ބާތިލްކޮށް ދެއްވުމަށް އެދި ރައީސް ޔާމީންގެ ފަރާތްޕުޅުން ސްޕްރޯމްކޯޓަށް ވެސް ހުށަހެޅިއެވެ. އެހެންނަމަވެސް ކޯޓުން ނިންމެވީ އިންތިޚާބު ބާތިލް ކުރަންނުޖެހޭ ގޮތަށެވެ.
ޝަރީފް ވިދާޅުވީ އެއްވެސް ބޭފުޅަކު މޮޅު ކުރަން އަދި ބަލިކުރަން އީސީ އިން އެއްވެސް ކަމެއް ކުރައްވާފައި ނުވާނެ ކަމަށެވެ. އިލެކްޝަންސް ކޮމިޝަނުން މަސައްކަތް ކުރައްވާފައިވަނީ ޤާނޫނާ އެއްގޮތަށް ކަމަށް ވެސް އޭނާ ވިދާޅުވިއެވެ.
