ހުޅުމާލެ އާއި މާލެއާ ދެމެދު އެމްޓީސީސީން ދެމުން އައި ފެރީގެ ޚިދުމަތްތަކުގެ ތެރެއިން އޭސީ ފެރީ ނޫން ހުރިހާ ފެރީއެއް ހުއްޓާލަން އެކުންފުނިން ނިންމައިފިއެވެ.
އެމްޓީސީސީން ބުނެފައި ވަނީ މާދަމާ ރޭ ދަންވަރު 12 އިން ފެށިގެން މާލެ އާއި ހުޅުމާލެއާ ދެމެދު އެކުންފުނިން ދެމުން އައި ފެރީގެ ޚިދުމަތުން ދެން ލިބޭނީ ހަމައެކަނި އޭސީ ފެރީގެ ޚިދުމަތް އެކަނި ކަމަށެވެ. އެހެންވެ މާދަމާ ރެއިން ފެށިގެން އާދައިގެ ފެރީ (އޭސީ ނުކުރާ ފެރީ) އާއި ލޯންޗު ފެރީގެ ޚިދުމަތްވެސް ހުއްޓާލާނެއެވެ. އެމްޓީސީން މީގެކުރިން ވަނީ ސައިކަލް ފެރީވެސް ހުއްޓާލާފައެވެ.
އާދައިގެ ފެރީ އާއި ލޯންޗު ފެރީ ހުއްޓާލީ މާލެ އާއި ހުޅުމާލެއާ ދެމެދު ބްރިޖަކުން ގުޅާލުމުން ފެރީގެ ޚިދުމަތް ހޯދަމުން އަންނަ މީހުން މަދުވުމުންނެވެ. އާންމު ފެރީގެ ޓިކެޓެއްގެ އަގަކީ 5.50 ރ އެވެ. ލޯންޗު ފެރީގެ ޓިކެޓެއް އުޅެނީ 25 ރ އަށެވެ. ނަމަވެސް ދެން ލިބޭނީ ހަމައެކަނި އޭސީ ފެރީގެ ޚިދުމަތް ކަމަށްވާއިރު އޭސީ ފެރީގެ ޓިކެޓްގެ އަގު އުޅެނީ 10 ރުފިޔާއަށެވެ.
މާލެ އާއި ހުޅުމާލެ ބުރިޖަކުން ގުޅާލުމުން ކުރިން ފެރީގައި ދަތުރު ކުރަމުން އައި ގިނަމީހުން މިހާރު ދަތުރު ކުރަނީ އެއްގަމު މަގުންނެވެ.
