ރާއްޖޭގެ ކުރީގެ ނާއިބު ރައީސް އަޙުމަދު އަދީބަށް ބޭސްފަރުވާ ކުރުމުގެ ފުރުސަތު ދިނުމަށް ކަމާބެހޭ ފަރާތްތަކަށް ޕީޕީއެމަށް ނިސްބަތްވެ ވަޑައިގަންނަވާ ދެ މެމްބަރަކު ގޮވައި ލައްވައިފިއެވެ.
ބިލެތަދޫ ދާއިރާގެ މެމްބަރު އަޙުމަދު މުބީން ކުރައްވައިފައިވާ ޓްވީޓެއްގައި ވިދާޅުވެފައިވަނީ އަޙުމަދު އަދީބަށް ބޭސްފަރުވާ ކުރުމަށް ފަހިކޮށްދޭންޖެހޭ ހުރިހާކަމެއް ވީހާވެސް އަވަހަށް ކޮށްދެއްވުމަށް ކަމާބެހޭ ފަރާތްތަކަށް ގޮވައިލައްވާ ކަމަށެވެ.
މުބީންގެ އިތުރަށް ރައްޔިތުންގެ މަޖިލީހުގެ ވެލިދޫ ދާއިރާގެ މެމްބަރު ޔާމީން ރަޝީދު ކުރައްވައިފައިވާ ޓްވީޓެއްގައި ވިދާޅުވެފައިވަނީ ބަލިވީމައި ބޭސްފަރުވާ ކުމަކީ އިންސާނީ ޙައްޤެއް ކަމަށެވެ. އެކަމަށް އިހުމާލުވުމަކީ އިންސާނީ ކަރާމާތަށް އިހުމާލުވުން ކަމަށް ވެސް ވިދާޅުވެފައިވެއެވެ.
"ބަލިވީމައި ބޭސްކުރެއްވުން އެއީ އިންސާނީ ޙައްޤެއް. އެކަމަށް އިހުމާލު ވުމަކީ އިންސާނީ ކަރާމާތަށް އިހުމާލުވުން. އެކުވެރި އަޙުމަދު އަދީބަށް ބޭސްފަރުވާގެ އެންމެހާ ފުރުސަތުތައް ފަހިކޮށްދިނުމަށް ކަމާބެހޭ އެންމެހާ ފަރާތްތަކަށް ގޮވާލަން" އަދީބާއެކު ނަންގަވައިފައިވާ ފޮޓޯއަކާއެކު ކުރައްވައިފައިވާ ޓްވީޓެއްގައި ޔާމީން ވިދާޅުވެފައިވެއެވެ.
އަޙުމަދު އަދީބު މިހާރު ގެންދަވަނީ ޖަލުގައި 33 އަހަރުގެ ޙުކުމެއް ތަންފީޒު ކުރައްވަމުންނެވެ. އެމަނިކުފާނުގެ ޢާއިލާއިންވަނީ އަދީބަށް ބޭސް ކުރުމަށް ރާއްޖެއިން ބޭރަށް ވަޑައިގެންނެވުމުގެ ހުއްދައަކަށް އެދިފައެވެ. އަދި އިދިކޮޅު ފަރާތްތަކުން ވެސް ގެންދަވަނީ އަދީބަށް އެފުރުޞަތު ދެއްވުމަށް ގޮވައިލައްވަމުންނެވެ. އެހެންނަމަވެސް އަދި މިސަރުކާރުން އެފުރުޞަތު ދެއްވައިފައި ނުވެއެވެ.
ކުރީގެ ރައީސް މުޙައްމަދު ނަޝީދު ވިދާޅުވެފައިވަނީ ޙުކުމް ތަންފީޒު ކުރަން ޖަލުގައި ހުންނަ މީހަކަށް އިތުރު އަނިޔާތަކެއް ލިބިގެން ނުވާނެ ކަމަށެވެ. އަދީބާއެކު ޖަލުގައި އުޅުއްވި ބައެއް ބޭފުޅުން ވިދާޅުވެފައިވަނީ އަދީބު ޖަލުގައި އުޅުއްވަމުން ގެންދަވަނީ ވަރަށް ވޭނުގައި ކަމަށެވެ.
