ރާއްޖޭގެ ކުރީގެ ނާއިބު ރައީސް އަޙުމަދު އަދީބާއި ކުރީގެ ޑިފެންސް މިނިސްޓަރު އަޙުމަދު ނާޒިމް މިނިވަން ކުރުމަށް ރައްޔިތުންގެ މަޖިލީހުގެ އިނގުރައިދޫ ދާއިރާގެ މެމްބަރު އިބްރާހީމް ފަލާޙު ގޮވައިލައްވައިފިއެވެ.
ފަލާޙު ކުރައްވައިފައިވާ ޓްވީޓެއްގައި ވިދާޅުވެފައިވަނީ އަޙުމަދު އަދީބަށް ހަމަހަމަ ކަމާއެކު އިންސާފު ލިބެން ޖެހޭކަމަށެވެ. "ވައިސް ޕްރެޒިޑެންޓް އަޙުމަދު އަދީބަށް ހަމަހަމަ ކަމާއެކު އިންސާފު ލިބި މިނިވަން ކުރުމަށް ކަމާބެހޭ ފަރާތްތަކަށް ގޮވައިލަން،" އޭނާގެ ޓްވީޓުގައި ވިދާޅުވެފައިވެއެވެ.
އަދީބުގެ އިތުރަށް ކުރީގެ ޑިފެންސް މިނިސްޓަރު އަޙުމަދު ނާޒިމް މިނިވަން ކުރެއްވުމަށް ގޮވައިލައްވައި ފަލާޙު ވަނީ އިތުރު ޓްވީޓެއް ކުރައްވައިފައެވެ. އޭގައި ވިދާޅުވެފައިވަނީ ކާނަލް ނާޒިމަކީ އެންމެ ފުރަތަމަ އިންސާފު ލިބި މިނިވަންވާންޖެހޭ ބޭފުޅާ ކަމަށެވެ.
"ކާނަލް ނާޒިމަކީ އެންމެ ފުރަތަމަ އިންސާފުލިބި މިނިވަން ވާންޖެހޭ ބޭފުޅާކަން ޔަޤީން. މިކަން ކަމާބެހޭ ފަރާތްތަކުން އަވަސްކޮށްދިނުމަށް ގޮވާލަން،" ނާޒިމް މިނިވަން ކުރުމާބެހޭ ގޮތުން ފަލާހު ކުރައްވައިފައިވާ ޓްވީޓުގައި ވިދާޅުވެފައިވެއެވެ.
ކާނަލް ނާޒިމް ޖަލު ޙުކުމެއް ތަންފީޒު ކުރައްވަމުން ގެންދަވަނީ އޭނާ އުޅުއްވި އެޕާޓްމެންޓުގައި ހަތިޔާރު ގެންގުޅުއްވި ކަމުގެ ކުށް ކޯޓުގައި ސާބިތުވެ ޙުކުމް ކުރެއްވުންނެވެ. އޭނާގެ މައްޗަށްވަނީ 11 އަހަރުގެ ޖަލު ޙުކުމެއް އިއްވައިފައެވެ. ނާޒިމް މިވަގުތު ހުންނެވީ ޞިއްޙީ ފަރުވާއަކަށް ރާއްޖެއިން ބޭރުގައެވެ.
ކުރީގެ ނާއިބު ރައީސް އަޙުމަދު އަދީބުގެ މައްޗަށް ވަނީ 33 އަހަރުގެ ޖަލުޙުކުމެއް އިއްވައިފައެވެ.
ޕީޕީއެމްގެ ޕާލަމެންޓްރީ ގްރޫޕުގެ ޑެޕިޔުޓީ ލީޑަރު ފަލާޙު މިކަމަށް ގޮވައިލެއްވީ ކުރީގެ ރައީސް މުޙައްމަދު ނަޝީދާއި، ކުރީގެ ރައީސް މައުމޫން ޢަބްދުލްޤައްޔޫމާއި، މާމިގިލީ ދާއިރާގެ މެމްބަރު އަދި ޖޭޕީގެ ލީޑަރު ޤާސިމް އިބްރާހީމާއި، ޢަދާލަތު ޕާޓީގެ ރައީސް އައްޝައިޚް ޢިމްރާން ޢަބްދުﷲ ގެ އިތުރަށް އަދިވެސް އިތުރު ސިޔާސީ ބޭފުޅުން މިނިވަން ކުރައްވައިފައިވާ ވަގުތެއްގައެވެ.
