ދެކުނުގެ އަތޮޅުތަކަށް މިހާރު ކުރަމުންދާ ވިއްސާރައިގައި އައްޑޫ ސިޓީ ހިތަދުއަށް ބޯކޮށް ވާރޭވެހި ބައެއް މަގުތަކާއި ގޯތިތަކުގައި ފެންބޮޑުވެ ގެއްލުން ވެއްޖެއެވެ.
ބައެއް ގޯތިތަކަށް ފެންވަދެ ފޫޓަކަށް ފެންބޮޑުވެފައިވެއެވެ. ޚާއްސަކޮށް ތިރިހިސާބުތަކުގެ ގޭގެއަށް ފެންވަދެ ކޮޓަރިތަކުގައިހުރި އެނދާއި، އަލަމާރިއާއި، ފޮށިފަދަ ތަކެއްޗަށް ވަނީ ގެއްލުންވެ އުކާލަންޖެހިފައެވެ. އެފަދަ ގެތަކުން ގެންދަނީ ފެން ހިންދުމުގެ މަސައްކަތް އަމިއްލައަށް ކުރަމުންނެވެ.
މޫސުމާބެހޭ އޮފީހުންވަނީ ގއ. އިން ފެށިގެން އައްޑޫސިޓީއާ ހަމައަށް ޔެލޯ އެލާޓް ނެރެފައެވެ.
މަޢުލޫމާތު ލިބިފައިވާ ގޮތުގައި ރެއިން ފެށިގެން ފުވައްމުލަކު ސިޓީއަށާއި ހުވަދުއަތޮޅުގެ ރަށްރަށަށް ވެސް ދަނީ ވާރޭ ވެހެމުންނެވެ. "ރެއިން ފެށިގެން މިރަށަށް ވާރޭވެހުން ނުހުއްޓޭ. އެހެންނަމަވެސް މިވަގުތުވަނީ ތުނިކޮށްލާފައި،" ފުވައްމުލަކު ސިޓީން ވާހަކަ ދެއްކި މީހަކު ބުންޏެވެ. އެއްވެސް ގެއެއްގައި ފެންބޮޑުވެން އުޅޭވާހަކައެއް އޭނާ ނުބުނެއެވެ.
އެމްއެންޑީއެފުން ވިދާޅުވެފައިވަނީ އައްޑޫސިޓީ ހިތަދުއަށް ބޯކޮށް ވާރޭވެހި ފެންބޮޑުވުމުން ހިތަދޫ ފަޔަރސްޓޭޝަނުގެ ޓީމެއް ދަނީ އެހީތެރިކަން ފޯރުކޮށް ދެމުން ކަމަށެވެ.
