ރައްޔިތުންގެ މަޖިލީހުގެ ރައީސަކަށް މާމިގިލީދާއިރާގެ މެމްބަރު ޤާސިމް އިބްރާހީމް މިރޭ އިންތިޚާބު ކުރައްވައިފިއެވެ.
ރައްޔިތުންގެ މަޖިލީހުގައި މިހާރު ހިނގަމުންދާ ޖަލްސާގައި ޤާސިމް އިބްރާހީމާ ވާދަ ކުރެއްވީ ފޮނަދޫދާއިރާގެ މެމްބަރު ޢަބްދުއްރަޙީމް ޢަބްދުﷲ އެވެ. ޤާސިމް އިބްރާހީމް ރައްޔިތުންގެ މަޖިލީހުގެ ރައީސް ކަމަށް އިންތިޚާބުވެ ވަޑައިގެންނެވީ 62 ވޯޓު ހޯއްދަވައިގެންނެވެ. ޢަބްދުއްރަޙީމަށް ލިބިވަޑައިގެންނެވީ 16 ވޯޓެވެ. ބާތިލް 2 ވޯޓެވެ.
ރައްޔިތުންގެ މަޖިލީހުގެ ރައީސަކަށް ޤާސިމް އިންތިޚާބު ކުރެއްވީ ކުރިން އެމަޤާމު ފުރުއްވަމުން ގެންދެވި ޢަބްދުﷲ މަސީޙު މިއަދު އިސްތިއުފާ ދެއްވުމުންނެވެ. މަސީޙު އިސްތިއުފާ ދެއްވީ އޭނާގެ އިތުބާރުނެތް ކަމުގެ ވޯޓުނެގުމަށް މިރޭގެ ޖަލްސާއަށް އެޖެންޑާ ކުރައްވައިފައިވަނިކޮށްނެވެ.
ޤާސިމް އިބްރާހީމަކީ ރައްޔިތުންގެ ޚާއްސަ މަޖިލީހުގެ ރައީސްކަން ވެސް ކުރައްވައިފައިވާ ތަޖުރިބާކާރު ބޭފުޅެކެވެ.
