ރައްޔިތުންގެ މަޖިލީހުގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ކަނޑައަޅައިފައިވާ 12 މެމްބަރުންގެ ގޮނޑި ވެސް ނުގެއްލޭ ކަމަށް ސްޕްރީމްކޯޓުން ޙުކުމް ކުރައްވައިފިއެވެ.
އެ 12 މެމްބަރުންގެ ތެރެއިން އެންމެފަހުން ތިއްބެވި މެމްބަރުންގެ ގޮނޑި ނުގެއްލޭ ކަމަށް ސްޕްރީމް ކޯޓުން ނިންމެވި މިއަދުއެވެ. ގޮނޑި ނުގެއްލާ ކަމަށް މިއަދު ނިންމެވި 4 މެމްބަރުންނަކީ އިހަވަންދޫ ދާއިރާގެ މެމްބަރު މުޙައްމަދު ޢަބްދުﷲއާއި، ހަނިމާދޫ ދާއިރާގެ މެމްބަރު ޙުސައިން ޝަހުދީއާއި، ތިމަރަފުށީ ދާއިރާގެ މެމްބަރު މުޙައްމަދު މުސްޠަފާއާއި، ފުވައްމުލަކު އުތުރު ދާއިރާގެ މެމްބަރު ޢަލީ ޝާހެވެ.
ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ކަނޑައެޅި 12 މެމްބަރުންގެ ތެރެއިން 4 މެމްބަރެއްގެ ގޮނޑި ނުގެއްލޭ ކަމަށް ސްޕްރީމް ކޯޓުން ޙުކުމްކުރެއްވީ ހުސްވި ސެޕްޓެމްބަރު މަހުއެވެ. އަނެއް 8 މެމްބަރުންގެ ގޮނޑި ނުގެއްލޭ ކަމަށް ޙުކުމް ކުރެއްވީ މިމަހުއެވެ.
އޭގެ ތެރެއިން އެންމެފަހު 4 މެމްބަރުންގެ ގޮނޑި ނުގެއްލޭ ކަމަށް ޙުކުމް ކުރެއްވީ މިއަދު އެވެ. ގޮނޑި ނުގެއްލޭ ކަމަށް މިއަދު ޙުކުމް ކުރެއްވި 4 މެމްބަރުންގެ އިތުރަށް ދެން ހިމެނެނީ ތުލުސްދޫ ދާއިރާގެ މެމްބަރު މުޙައްމަދު ވަހީދާއި، މައްޗަންގޯޅި ދެކުނު ދާއިރާގެ މެމްބަރު ޢަބްދުﷲ ސިނާނާއި، ދިއްދޫ ދާއިރާގެ މެމްބަރު ޢަބްދުއްލަޠީފް މުޙައްމަދާއި، ތިނަދޫ އުތުރު ދާއިރާގެ މެންބަރު ސައުދުﷲ ޙިލްމީއާއި، ވިލިނގިލީ ދާއިރާގެ މެމްބަރު ސަޢުދު ޙުސައިނާއި، މަޑުއްވަރީ ދާއިރާގެ މެމްބަރު މުޙައްމަދު އަމީތާއި، ތިނަދޫ ދެކުނު ދާއިރާގެ މެމްބަރު ޢަބްދުﷲ އަޙްމަދާއި، ދަނގެތީ ދާއިރާގެ މެމްބަރު އިލްހާމް އަޙްމަދެވެ.
މި ހުރިހާ މެމްބަރުންނަކީ ވެސް ކުރިން ޕީޕީއެމްގެ މެމްބަރުންނެވެ. މި މެމްބަރުންގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ނިންމެވީ ސްޕްރީމް ކޯޓުން ނެރުނު އަމުރަކަށް ރިޢާޔަތް ކޮށްފައެވެ. އެހެންނަމަވެސް ސްޕްރީމް ކޯޓުން ވިދާޅުވެފައިވަނީ އެ އަމުރުގައިވާ ކަންކަމަށް ބަލާއިރު މި މެމްބަރުން އެއަށް ނުފެތޭ ކަމަށެވެ.
މިހުރިހާ މެމްބަރުންގެ ގޮނޑިތަކާ ބެހޭ މައްސަލަ ފައިސާލާ ކުރެއްވުމަށްފަހު އިއްވެވި ޙުކުމުގައި ސްޕްރީމްކޯޓުން ވިދާޅުވެފައިވަނީ މެންބަރުންގެ ގޮނޑިއާ ބެހޭގޮތުން ގޮތް ނިންމުމުގެ ބާރު އިލެކްޝަންސް ކޮމިޝަނާއި އަދި އެހެން މުޢައްސަސާއަކަށް ވެސް ލިބިގެން ނުވާކަމަށެވެ. އެބާރު އޮންނާނީ ހަމައެކަނި ސްޕްރީމްކޯޓަށް ކަމަށް ވެސް ވިދާޅުވެފައިއެވެ.
މި މެމްބަރުންގެ ގޮނޑި ނުގެއްލޭ ކަމަށް ޙުކުމް ކުރެއްވުމުން އިދިކޮޅުގައި މިހާރު 45 މެމްބަރުން ތިބޭނެއެވެ. އަދި ސަރުކާރު ފަޅީގައި މިވަގުތު ތިބޭނީ 40 މެމްބަރުންނެވެ.
