އިސްލާމިކް ޔުނިވަރސިޓީ އޮފް މޯލްޑިވްސް (އައިޔޫއެމް) ގެ ލެޕްޓޮޕް ތަކެއް ގެއްލިއްޖެ ކަމަށް އެޔުނިވަރސިޓީން ވިދާޅުވެއްޖެއެވެ.
އެ ޔުނިވަރސިޓީން ނެރެފައިވާ ނޫސްބަޔާނެއްގައި ވިދާޅުވެފައިވަނީ އެތަނުން ގެއްލިފައިވަނީ އެކެޑެމިކް މުއައްޒަފުން ބޭނުންކުރާ ލެޕްޓޮޕް ތަކެއް ކަމަށެވެ. އެބަޔާނުގައި ވިދާޅުވެފައިވަނީ ލެޕްޓޮޕްތައް ގެއްލުމަކުން އެތަނުންދޭ އިމްތިޙާން ތަކަށް އެއްވެސް އަސަރެއް ނުކުރާނެ ކަމަށެވެ.
ލެޕްޓޮޕްތައް ގެއްލުނަސް "މިހާރު ކުރިއަށްދާ ޔުނިވަރުސިޓީގެ އިމްތިޙާންގެ ޞައްޙަ ކަމަށް އެއްވެސް އަސަރެއް ނުކުރާނެ ކަމުގައި ދަނަންވަމެވެ. އަދި ދަރިވަރުންނަށް އިމްތިޙާންތައް ދޭނީ ޝައްކެއްނެތް މިންވަރަށް އިމްތިޙާނުގެ ކަންކަން ކަށަވަރު ކުރުމަށްފަހު، ދަރިވަރުން އިމްތިޙާން ކުރުމާއި ފެންވަރު ވަޒަން ކުރުމުގެ ޤަވާޢީދު ގައިވާ ގޮތަށް ކަމުގައި ޔަޤީންކޮށްދެމެވެ.،" އެބަޔާނުގައި ވިދާޅުވެފައިވެއެވެ.
އައިޔޫއެމްއިން ވިދާޅުވެފައިވަނީ ލެޕްޓޮޕްތައް ގެއްލުނު މައްސަލަ މިހާރުވަނީ ފުލުހުންނަށް ހުށަހަޅައިފައި ކަމަށެވެ. ފުލުހުން މިހާރު ގެންދަވަނީ އެ މައްސަލަ ތަޙުޤިޤު ކުރައްވަމުން ކަމަށްވެސް ވިދާޅުވެފައިވެއެވެ.
އެ މައްސަލަ ތަޙުޤީޤު ކުރައްވަމުން ގެންދަވާ މިވަގުތުގައި ނޫސްތަތަކުން އެ ވާހަކަ ގެނެސް ދެމުން ގެންދަނީ ޙަޤީޤަތް އޮޅޭގޮތަކަށް ކަމަށްވާތީ އެކަން ކުށްވެރިކުރައްވާ ކަމަށް ވެސް އެބަޔާނުގައި ވިދާޅުވެފައިވެއެވެ. އެހެން ކަމުން އެފަދަ ކަންކަން ނުކުރެއްވުމަށް ނޫސްތަކަށާއި ނޫސްވެރިންނަށް އިލްތިމާސް ކުރައްވާ ކަމަށް އައިޔޫއެމް އިން ވިދާޅުވެފައިވެއެވެ.
