އިއްޔެ މެންދުރުފަހު ވަޅިން ހަމަލާދީ މާލޭގައި ޒަޚަމްކޮށްލި ޒުވާނާގެ ޙާލު ސީރިއަސް ކަމަށް އޭޑީކޭ ހޮސްޕިޓަލުން ވިދާޅުވެއްޖެއެވެ.
ހޮސްޕިޓަލުގެ މެނޭޖިންޑިރެކްޓަރ އަޙުމަދު އައްފާލް ވިދާޅުވީ ޢުމުރުން 28 އަހަރުގެ އެ ޒުވާނާގެ ޙާލު ސީރިއަސް ކަމަށެވެ. އޭޑީކޭ ޑޮކްޓަރުން އޭނާއަށް ފަރުވާ ދެމުން ގެންދަނީ އައިސީޔޫގައި ބާއްވައިގެން ކަމަށް ވެސް އައްފާލް ވިދާޅުވިއެވެ. އެހެންނަމަވެސް އެޒުވާނާއަށް ލިބިފައިވާ ޒަޚަމްތަކާއި އޭނާގެ ޙާލަތާބެހޭ ތަފްސީލީ މަޢުލޫމާތެއް އައްފާލް ނުދެއްވައެވެ.
އިއްޔެ މެންދުރުފަހު އެޒުވާނާއަށް އެޙަމަލާ ދީފައިވަނީ ސައިކަލެއްގައި އައިބައެކެވެ. މަޢުލޫމާތު ލިބިފައިވާ ގޮތުގައި އެ ޒުވާނާއަށް ޙަމަލާދީފައިވަނީ އޭނާ ވެސް ސައިކަލެއްގައި ދަނިކޮށްނެވެ. މި މާރާމާރީ ހިންގާފައިވަނީ ހެންވޭރު ޕީޕީއެމް އޮފީސް ހުންނަ ސަރަޙައްދުގައެވެ.
މި މައްސަލައިގައި އަދި އެއްވެސް މީހަކު ބަންދުކޮށްފައި ނުވާކަމަށް ފުލުހުން ވިދާޅުވިއެވެ. އަދި އެ ކަމާގުޅިގެން ބަޔަކު ނުވަތަ މީހަކު ހޯދަމުންދާ ކަމަށް ވެސް ފުލުހުން ވިދާޅުނުވިއެވެ. އަދި ޝައްކު ކުރެވޭ މީހަކު ކުރިކަމަށް ވެސް ފުލުހުން ވިދާޅު ނުވިއެވެ. އެހެންނަމަވެސް އެ އަމަލު ހިންގި ކަމަށް ތުޖުމަތުކުރެވޭ ބައެއް ކަމަށްބުނެ ސޯޝަލް މީޑިއާގައި އެ މީހުން ވަނީ ފޮޓޯތަކެއް އާންމުކޮށްފައެވެ.
މާލޭގައި މިފަދަ ހަމަލާތައް މިހާރުވަނީ އިތުރުވެފައެވެ. ފުލުހުން ކުރިން ވިދާޅުވެފައިވަނީ އެފަދަ ކަންކަން ހުއްޓުވުމަށް އަބަދުވެސް ޚާއްސަ މަސައްކަތްތަކެއް ކުރައްވާ ކަމަށެވެ.
