ކުރީގެ ރައީސް މުޙައްމަދު ނަޝީދު މިނިވަން ކުރައްވަން ރައްޔިތުންގެ މަޖިލީހަށް ހުށަހަޅުއްވައިފައިވާ ޤަރާރު ކޮންމެ ގޮތަކަށް ފާސްވިޔަސް އޭގައި ޤާނޫނީ ސަބަބުތަކެއް ނެތް ކަމަށްވާނަމަ އެއަށް ޢަމަލު ކުރައްވަން ޕްރޮސެކިޔުޓަރޖެނެރަލްއަށް ޖެހިވަޑައި ނުގަންނަވާނެ ކަމަށް ކުރީގެ ޑެޕިޔުޓީ ޕްރޮސެކިޔުޓަރ ޖެނެރަލް ޙުސައިން ޝަމީމް ވިދާޅުވެއްޖެއެވެ.
ރައީސް މުޙައްމަދު ނަޝީދުގެ މައްޗަށް ކުރައްވައިފައިވާ 13 އަހަރުގެ ޖަލު ޙުކުމުން އެމަނިކުފާނު މިނިވަން ކުރެއްވުމަށް ގަލޮޅު އުތުރުދާއިރާގެ މެމްބަރު އީވާ ޢަބްދުﷲ އިސްވެ ހުންނަވައިގެންވަނީ މަޖިލީހަށް ޤަރާރެއް ހުށަހަޅުއްވައިފައެވެ. އޭގައި 45 މެމްބަރުންވަނީ ސޮއި ކުރައްވައިފައެވެ.
ޝަމީމް ވިދާޅުވީ ރައީސް ނަޝީދު މިނިވަން ކުރެއްވުމާމެދު މަޖިލީހުން ނިންމާގޮތެއް ޕްރޮސެކިޔުޓަރޖެނެރަލް އަށް ހުށަހަޅައިގެން އޭގައި ހުރި ޤާނޫނީ ސަބަބުތައް ރަނގަޅުތޯ ޕީޖީއަށް ބެއްލެވިދާނެ ކަމަށެވެ. އަދި ޤާނޫނީ ސަބަބުތަކެއް ހުރިކަމަށް ޕީޖީއަށް ޤަބޫލުކުރެއްވޭ ކަމަށްވާނަމަ އެ މައްސަލަ ރިވިއުކުރަން ސްޕްރީމްކޯޓަށް ހުށަހެޅުއްވިދާނެ ކަމަށް ވިދާޅުވިއެވެ.
"އެކަމަކު ޕީޖީއަށް ލާޒިމެއް ނުވާނެ މަޖިލީހުން ބުނާގޮތެއް ހަދާކަށް. އެކަމަކު މަޖިލީހުގެ ނިންމުން ޕީޖީއަށް ޤަބޫލު ކުރެވެންޏާ ހުށަހެޅިދާނެ ސްޕްރީމް ކޯޓަށް. މަޖިލީހުގެ ނިންމުމުގައި ހުންނާނެތާ ޤާނޫނީ ސަބަބުތަކެއް. މަޖިލީހުން ކުރާނީ ސިޔާސީ ނުވަތަ ޤާނޫނީ ކަމެއް. އެއިން ސިޔާސީ ސަބަބުތަކަށްޓަކައި ކުރާކަމަކަށް ޕީޖީ ޢަމަލު ކުރައްވާކަށް ޖެހިވަޑައިނުގަންނަވާނެ. އެކަމަކު އޭގައި ޤާނޫނީ ސަބަބުތަކެއް ބަޔާން ކުރައްވައިފައި އޮވެއްޖެނަމަ ޕީޖީ ބައްލަވަންޖެހޭނެ އޭގައި ބުނެފައިވަނީ ރަނގަޅު ވާހަކައެއްތޯ ނުވަތަ ނޫންތޯ،" މަޝްހޫރު ޤާނޫނީ ވަކީލް ޝަމީމް ވިދާޅުވިއެވެ.
އޭނާ ވިދާޅުވީ ޕީޖީއަކަށް ހުންނަވާ ބޭފުޅަކަށްވެސް ގޯސް ހެއްދެވިދާނެ ކަމަށެވެ. ގޯހެއް ހެއްދެވިއްޖެ ކަމުގެ އިޙުސާސް ކުރެއްވޭ ކަމަށްވާނަމަ އެގޯސް ރަނގަޅު ކުރެއްވުމަކީ ވަރަށް ރަނގަޅު ކަމެއްކަމަށް ވެސް ވިދާޅުވިއެވެ. އެގޮތަށް ހެދިފައި ހުންނަ މައްސަލަތައް ރަނގަޅު ކުރެއްވުމަކީ "މައްސަލައެއްނޫން" ކަމަށް ވެސް ޝަމީމް ވިދާޅުވިއެވެ.
"އަޅުގަނޑަށް ފެންނަނީ މަޖިލީހުން ނިންމަވާ ނިންމެވުމުގައި އެކަށީގެންވާ ރަނގަޅު ޤާނޫނީ ސަބަބުތަކެއް ހުރެއްޖެ ކަމަށްވާނަމަ ޕީޖީއަށް އެކަން ކޯޓަށް ހުށަހެޅުއްވިދާނެޔޭ ރިވިއުކުރަން،"
ރައީސް ނަޝީދުގެ މައްސަލަ ކޯޓަށް ހުށަހަޅައިގެން ހައްލު ހޯއްދެވުމުގެ ބަދަލުގައި މަސައްކަތް ކުރައްވަމުން ގެންދަވަނީ މަޖިލީހަށް ހުށަހަޅައިގެން ޙައްލެއް ހޯއްދެވުމަށެވެ. އެހެންނަމަވެސް އެކަން އެގޮތަށް ކުރުމަކީ ޤާނޫނީ ގޮތުން ބަލާއިރު ކުރެވޭނެ ކަމެއް ކަމަށް ބައެއް ވަކީލުން ޤަބޫލެއް ނުކުރައްވައެވެ.
ކުރީގެ ރައީސް މައުމޫން ޢަބްދުލްޤައްޔޫމާއި، އެމަނިކުފާނުގެ ދަރިކަލުން ފާރީސް މައުމޫނާއި، ޖޭޕީގެ ބާނީ ޤާސިމް އިބްރާހީމްގެ މައްޗަށް ކްރިމިނަލް ކޯޓުން ކުރައްވައިފައިވާ ޙުކުމްތައްތައް ހައިކޯޓުގައި އިސްތިއުނާފު ކުރައްވައިގެން އެބޭފުޅުން ވަނީ ސަލާމަތްވެ ވަޑައިގެންފައެވެ. އެހެންނަމަވެސް ރައީސް ނަޝީދާއި، ޢަދަލާތު ޕާޓީގެ ރައީސް ޝައިޚް އިމްރާންގެ މައްސަލަ ހައިކޯޓުގައި އިސްތިއުނާފް ކުރެއްވި ކަމެއް އަދި އެނގިފައެއް ނުވެއެވެ.
