އައު ރައީސުލްޖުމްހޫރިއްޔާ ރައީސް ކަމުގެ ހުވައިކުރެއްވީ ޤާނޫނާ ޚިލާފަށޭ އެއްވެސް ޒަމާނެއްގައި އެއްވެސް ބަޔަކު ބުނަން ބޭނުންފުޅުނުވާ ކަމަށް އިންތިޚާބީ ރައީސް އިބްރާހީމް މުޙައްމަދު ޞާލިހު (އިބޫ) ވިދާޅުވެއްޖެއެވެ.
އެމަނިކުފާނު މިގެން ވިދާޅުވީ އިންތިޚާބީ ރައީސް ހުވައިކުރައްވާނެ ދުވަހެއް ކަމަށް ނޮވެމްބަރު 11 ކަނޑައަޅައިދިނުމަށް މަޖިލީހަށް ހުށަހަޅުއްވައިފައިވާ މައްސަލައިގެ ބަޙުސްގައި ވާހަކަފުޅު ދައްކަވަމުންނެވެ.
"އެއްވެސް ޒަމާނެއްގައި، މިފެށޭ ދައުރުގެ ރައީސުލްޖުމްހޫރިއްޔާ ކަމުގެ މަޤާމުގެ ހުވައި އަޅުގަނޑުކުރީ ޤާނޫނު ޢަސާސީއާ ޚިލާފަށޭ ބުނާނެ ޖާގައެއް ދޭކަށް އަޅުގަނޑު އަމިއްލަ ނަފްސަށް ޤަބޫލެއް ނުކުރެވޭ،" އިބްރާހީމް މުޙައްމަދު ޞާލިޙު ވިދާޅުވިއެވެ. .
ޤާނޫނީ ބައެއް ވަކީލުން ވިދާޅުވާ ގޮތުގައި އިބްރާހީމް މުޙައްމަދު ޞާލިޙު އެ ވިދާޅުވަނީ ރައްޔިތުންގެ މަޖިލީހުން ނިންމަންޖެހޭނީ އެ މައްސަލަ ސްޕްރީމް ކޯޓަށް ހުށަހެޅުމަށް ކަމަށެވެ. "އިބޫ އިޝާރާތް އެކުރައްވަނީ ރައްޔިތުންގެ މަޖިލީހުން ޤަރާރެއް ފާސްކުރައްވަންވީއޭ އެމައްސަލަ ސްޕްރީމް ކޯޓަށް ހުށަހަޅަން. އިސްތިޝާރީ މައްސަލައެއްގެ ގޮތުގައި ސްޕްރީމް ކޯޓަށް މައްސަލަ ވައްދައިގެން ސްޕްރީމް ކޯޓުން އެ މައްސަލައަށް ގޮތެއް ނިންމަވަން އިންތިޚާބީ ރައީސް ބޭނުންފުޅުވެގެން އުޅުއްވާ ކަމަށް އަޅުގަނޑަށް ވިސްނެނީ،" ރާއްޖޭގެ މަޝްހޫރު ޤާނޫނީ ވަކީލަކު ވިދާޅުވިއެވެ.
އިބްރާހީމް މުޙައްމަދު ޞާލިޙު ވިދާޅުވީ މަޖިލީހުން ގޮތް ނިންމަވަންވާނީ އެއްވެސް ދުވަހަކުން ސްޕްރީމް ކޯޓަށް ގޮސްގެން އެކަން ނިންމަން ނުޖެހޭ ގޮތަށް ވެސް ބަލައިގެން ކަމަށް ކަމަށެވެ.
ހުވައިކުރުމުގެ ތާރީޚު ކަނޑައެޅުމުގައި ވަރަށްގިނަ ކަންކަމަށް ބަލަންޖެހޭ ކަމަށް ވެސް އިބްރާހީމް މުޙައްމަދު ޞާލިޙު ވިދާޅުވިއެވެ. އެގޮތުން ޑރ. މުޙައްމަދު ވަޙީދު ޙަސަން މަނިކު ވެރިކަމުގައި ހުންނެވީ "ނޮވެމްބަރު އެގާރައިގެ ފެށޭދައުރުގެ ހަދުވަހުތޯ ނުވަތަ ކުރިއަށްއޮތް ދައުރުގެ މުއްދަތު ދިގުކުރީތޯ. މިހިރީ އޮޅުން ފިލުވަން ޖެހޭ ކަންތައްތައް،" އެމަނިކުފާނު ވިދާޅުވިއެވެ.
މިއީ ސުވާލު އުފައްދަން ޖެހޭ ކަމެއް ވެސް ނޫން. އަބަދުވެސް މުއްދަތު ގުނާނީ އެކަމެއް ފެށި ހިސާބަކުން. ރޔ ހުވާކުރެއްވީ ނޮވެންބަރު 17 ކަން އެންމެންނަށް އެނގޭ. ރިޔާސަތުގެ ދައުރަކީ 5 އަހަރު ކަމަށް ޤާނޫނުއަސާސީގައި ސާފުކޮށް އެބަ ބުނޭ. ދެން އެންމެ 6 ދުވަހަށް މަޑުކޮށް ނުލެވިގެން މި އުޅޭނީ ކޮންފަދަ ރޭވުމެއް ރާވަނީބާ!