"ހުރިހާ ޔަހޫދީން މަރުވާން ޖެހޭ" ކަމަށް ބުނެ ހަޅޭއްލަވަމުން ބަޑި ހިފައިގެން އެމެރިކާގެ ޕެންސެލްވީނިއާގެ ޕިޓްސްބާގުގައި ހުންނަ ޔަހޫދީން ފައްޅިއަކަށް ވަން މީހަކު ބަޑިޖަހައި 11 މީހުން މަރާލައި 6 މީހުން ޒަޚަމްކޮށްލައިފިއެވެ. އޭނާ ފައްޅިއަށް ހަމަލާދިނީ ހޮނިހިރު ދުވަހުގެ އަޅުކަމުގައި މީހުން ތިއްބައެވެ. ޒަޚަމްވީ މީހުންގެ ތެރޭގައި 4 ފުލުހުން ހިމެނެއެވެ. ބަޑިޖެހި މީހާ މިހާރު ވަނީ ހައްޔަރުކުރެވިފައެވެ.
ނޫސްވެރިންނަށް މައުލޫމާތު ދެއްވަމުން ހުޅަނގު ޕެންސިލްވީނިޔާގެ އެޓާނީ ސްކޮޓް ބްރޭޑީ ވިދާޅުވީ ހަމަލާދިނީ ޕިޓްސްބާގުގައި ދިރިއުޅޭ އުމުރުން 46 އަހަރުގެ ރޮބަޓް ބޯވާސް ކަމުގައެވެ. އަދި އޭނާގެ މައްޗަށް ވަރަށް އަވަހަށް ދައުވާ އުފުލޭނެ ކަމުގައެވެ.
"ރޮބަޓް ބޯވާސްގެ އަމަލަކީ އިންސާނިއްޔަތުގެ އެންމެ ހުތުރު ފަރާތް ދައްކައިދިން އަމަލެއް. އަހަރެންގެ އޮފީހުގެ ހުރިހާ ވަސީލަތެއް މިޚާއްސަކުރަނީ ނަފްރަތު އެކުލެވޭ މިޖަރީމާ ތަހުގީގުކޮށް ދައުވާކުރުމަށް." އޭނާ ވިދާޅުވިއެވެ.
"މިމައްސަލައިގައި އިންސާފު އަވަސްވެފައި، ތައުފީޒުވާނެކަން ހުރިހާ އެެންމެންގެ މައުލޫމާތަށްޓަކައި ދަންނަވަން." އޭނާ އިތުރަށް ވިދާާޅުވިއެވެ.
ބަޑިޖެހި ބޯވާސް ގަޔަށް ވަަޒަން އަރަައި، އޭނާއަށް ހޮސްޕިޓަލުގައި ފަރުވާދެމުން ދާއިރު އޭނާގެ ހާލު ރަނގަޅުކަމަށް ވެއެވެ.
ހަމަލާގައި އެއްވެސް ކުޑަކުއްޖަކު މަރުވެފައިވާ ނުވާކަމަށާއި، ހޮސްޕިޓަލުގައި ފަރުވާދެމުންދާ މީހުންގެ ތެރޭގައި 61 އަހަރުގެ އަންހެނަކާއި، 70 އަހަރުގެ ފިރިހެނަކާއި، 55 އަހަރުގެ ފުލުސް އޮފިސަރަކު ހިމެނޭކަމަށް މައުލޫމާތު ލިބެއެވެ.
ޔަހޫދީ ރެފިއުޖީންގެ ޖަމްއިއްޔާއެއް ކަމަށްވާ ހީބްރޫ އިމިގްރެންޓް އެއިޑް ސޮސައިޓީ އިން "ބޭނުންވަނީ އަހަރުމެންގެ މީހުން މަރަން އެދި މިތަނަށް އަރައިގަންނަ މީހުން ގެންނަން. އަހަރެންގެ މީހުން ކަތިލާއިރު ކުޅިބަލަން އަހަންނަކަށް ނީނދެވޭނެ. އަހަރެން މިދަނީ" ބޯވަސް ހޮނިހިރު ދުވަހު ހެނދުނު އޭނާގެ ސޯޝަލް މީޑިއާ ސަފުހާއެއްގައި ލިޔެފައި އޮތެވެ.
ބޯވާާސް އޭނާގެ ހަމަލާގައި އެސޯލްޓް ރައިފަލަކާއި ތިން ހޭންޑް ގަން ބޭނުންކުރިކަމަށް ފުލުހުން ބުނެއެވެ.
ޕިޓްސްބާގުގައި ޔަހޫދީން ގިނަ އަދަދަކަށް ދިރިއުޅޭ ސްކުއީރަލް ހިލްގައި ހުންނަ ފައްޅިއަށް ބޯވާސް ހަމަލާ ދިނީ ޔަހޫދީން އެމީހުން 'ޝައްބަތު' އަޅުކަމުގައި ތިއްބައެވެ.
