ތިލަފުށީ ކައިރީގައި އޮތް ބާޖެއްގައި އަލިފާން ރޯވެ އަނދަމުންދާ ކަމަށް އެމްއެންޑީއެފުން ވިދާޅުވެއްޖެއެވެ.
އެމްއެންޑީއެފްގެ ތަރުޖަމާނު ކެޕްޓަން އިބްރާހީމް އާޒިމް ވިދާޅުވީ ބާޖުގައި އަލިފާން ރޯވާން ދިމާވި ސަބަބެއް އެނގިފައި ނުވާ ކަމަށެވެ. އަލިފާން ރޯވިއިރު އޭގައި 20 މީހުން ތިބި ކަމަށާއި އެންމެންވެސް މިހާރުވަނީ ޕޮލިސް ލޯންޗަކަށް ނަގައިފައި ކަމަށް އޭނާ ވިދާޅިވިއެވެ. އެއިން އެއްވެސް މީހަކަށް ގެއްލުމެއް ނުވާކަމަށް ވެސް އޭނާ ވިދާޅުވިއެވެ.
މިހާދިސާގެ މައުލޫމާތު ލިބިފައިވަނީ ހެނދުނު 7:53 އެހައިކަންހާއިރު ކަމަށް ވެސް އޭނާ ވިދާޅުވިއެވެ. މައުލޫމާތު ލިބުމާއެކު އެތަނަށް ސިފައިން ގޮސް އަލިފާން ނިއްވާލުމުގެ މަސައްކަތް ފެށި ކަމަށް ވެސް އާޒިމް ވިދާޅުވިއެވެ. އެހެންނަމަވެސް އަދި ވެސް އަލިފާން ކޮންޓްރޯލް ނުކުރެވެއެވެ. އޭގައި އެމޯނިއާ ގޭސް ގިނައަދަދަކަށް އެބަހުރި ކަމަށް އާޒިމް ވިދާޅުވިއެވެ.
އަލިފާން ރޯވެފައި ވަނީ “ސަން ޓޫނާ” ނަމަކަށް ކިޔާ ބާޖެއްގައެވެ. އެއީ 320 ފޫޓުގެ ބޮޑު ބާޖެކެވެ. ކަންނެލި މަސްވެރިކަންކުރާ ދޯނިފަހަރުން މަސްގަތުމާއި އައިސް ވިއްކުމުގެ މަސައްކަތުގައި ހަރަކާތްރިވާ މި ބާޖުގެ ބޮޑު ބައެއްގައިވަނީ ރޯވެފައެވެ.
ފަޔަރުންގެ މަސައްކަތުން ބާޖުގައި ރޯވެފައިވާ އަލިފާން ކޮންޓްރޯލް ކުރެވިފައިވަނީ މެންދުރުފަހު 2:25 ގައެވެ. ކެޕްޓަން އާޒިމް ވިދާޅުވީ އަލީފާން ކޮންޓްރޯލް ކުރުން ލަސްވީ ބާޖުގައި އެމޯނިއާ ގޭސް ގިނަވުމުގެ ސަބަބުންނެވެ.
