ސައޫދީ ވަލީއަހުދު އަމީރު މުޙައްމަދު ބިން ސަލްމާނަކީ ފާއިތުވި ފަންސާސް އަހަރު އެފަދަ ޒައީމަކަށް އިސްރާއީލުން އިންތިޒާރުކުރަމުން ދިޔަ އަރަބި ޒައީމުކަމުގައި އިސްލާއީލުގެ ދުވަހު ނޫސް ހާއާރެޓްޒް އިން ބުނެފިއެވެ.
އެ ނޫހުގެ ލިއުންތެރިޔާ ޓްޒަވިޔާ ގްރީންފީލްޑް ލިޔެ މިއަދުގެ ނޫހުގައި ޝާއިކުކޮށްފައިވާ ލިޔުމުގައި ވާގޮތުން، ސައޫދީ ނޫސްވެރިޔާ ޖަމާލު ޚާޝުޤްޖީ މަރާލި މައްސަލައިގައި މުހައްމަދު ބިން ސަލްމާނާމެދު ހަރުކަށި ފިޔަވަޅު އަޅައި އޭނާ ވެރިކަމުން ދުރުކޮށްފިނަމަ އިސްރާއީލަށް ވަރަށް ގެއްލުން ބޮޑުވާނެއެވެ.
އެ ނޫހުގައި ލިޔެފައިވާ ގޮތުގައި ތުރުކީގެ ރައީސު އެރްދޮޣާން ބޭނުންފުޅުވަނީ ޚާޝޮޤްޖީގެ މައްސަލަ ނަންގަވައިގެން ސައޫދީންގެ އަގުވައްޓަވާލައްވާށެވެ. މަގްސަދަކީ ރައީސު ޓްރަމްޕާއި މުޙައްމަދު ބިން ސަލްމާން ގުޅިގެން އިސްރާއީލާއި، ގަލްފުގެ ގައުމުތަކާއި، ސައޫދީ އަރަބިއްޔާއާއި، ޖޯޑަނާއި، މިސްރު (އަދި ފަހަރެއްގައި އިރާގުވެސް) ހިމެނޭގޮތަށް އެކުލަވާލަން އުޅޭ ކޯލިޝަން އެކުލަވާލިޔަ ނުދިނުމެވެ.
ލިޔުންތެރިޔާ ގްރީންފީލްޑް ލިޔެފައިވާ ގޮތުގައި އެ ކޯލިޝަންގެ ބޭނުމަކީ އެހުރިހާ ގައުމަކަށްވެސް ނުރައްކަލަކަށް ވެފައިވާ އީރާނު މައިތިރިކުރުމެވެ.
އެ ކޯލިޝަންގައި މުޙައްމަދު ބިން ސަލްމާން އިސް ދައުރެއް އަދާކުރެއްވުމަކީ ރައީސު އެރްދޮޣާން ބައްލަވަން ބޭނުންފުޅުވާ މަންޒަރެއް ނޫންކަމަށާއި، "ސައޫދީންގެ ތަސައްވަރު ކިލަނބުކުރެއްވުމުގައި އެރްދޮޣާންގެ މަގްސަދަކީ" އެއީ ކަމަށްވެސް ހާއާރެޓްޒްގައި ލިޔެފައި ވެއެވެ.
އެ ނޫހުން ގަބޫލުކުރާ ގޮތުގައި އެރްދޮޣާންގެ ޒައާމަތުގައި ތުރުކީން ދަނީ ހަމައެކަނި ސުންނީ މުސްލިމުން ތެރޭގައި ނަގާކިޔާ ގައުމަކަށް ވުމަށް އެކަންޏެއް ނޫނެވެ. އަދި ކިއެއްތަ، އިސްރާއީލަކީ މެދުއިރުމަތީގައި އިސްތިއުމާރީ ބާރުތަކުން އުފައްދާފައިވާ، ސަރަހައްދާއި ގުޅުމެއް ނެތް ބީރައްޓެހި ދައުލަތެއް ކަން ދުނިޔެއަށް ހާމަކުރުމަށެވެ.
ޚާޝުޤްޖީ މަރާލުމަކީ ރަހުމްކުޑަ އަނިޔާވެރި އަމަލެއްކަމާއި، ފެންނަން ހުރި ހެކިތަކުން މުޙައްމަދު ބިން ސަލްމާނު އަތެއް ވާކަން ދުނިޔެއަށް ހާމަވެފައިވާކަން ދުނިޔެއަށް ހާމަވެފައިވާ ކަން ހާއާރެޓްޒްގެ ލިޔުންތެރިޔާވެސް ގަބޫލުކުރެއެވެ. ނަމަވެސް އޭނާ ދެކޭގޮތުގަ އެމައްސަލައިގައި މުޙައްމަދު ބިން ސަލްމާނާ މުއާމަލާތްކުރަން ޖެހެނީ މަޑުމައިތިރި ގޮތަކަށެވެ. އަދި ސުލްހައިގެ މަޝްރޫއު ކުރިއަށް ނެރެވިއްޖެނަމަ،އެކަން ކާމިޔާބުކުރުމަށް އިތުރު ބާރު އަޅައި އެހެން މީހުންނަށް ފިއްތުންތައް ކުރިމަތިކުރުމުގެ ފުރުސަތު މުޙައްމަދު ބިން ސަލްމާނަށް ލިބޭނީ އޭރުންނެވެ. އަދި އިސްރާއީލަށް ގާނޫނީ ހައިސިއްޔަތު ހޯދައިދޭން އެންމެ ބޮޑަށް މަސައްކަތްކުރައްވާނީ ވެސް ބިން ސަލްމާންކަމަށް އޭނާ ދެކެއެވެ.
ލިޔުން ނިންމާލަމުން އެ ނޫހުގައި ބުނެފައިވާ ގޮތުގައި މުޙައްމަދު ބިން ސަލްމާން މަގާމުން ދުރުކުރުމަށް ގޮވައިލުމަކީ "އިސްރާއީލު ނައްތާލުމަށް" ގޮވައިލުމެވެ.
