ނިއުކުލިޔާ ހަތިޔާރު ކޮންޓުރޯލުކުުރުމަށް ފިނި ހަނގުރާމައިގެ ދުވަސްވަރު އެމެރިކާއާއި ރަޝިޔާއާއި ދެމެދު ވެފައިވާ އެއްބަސްވުން އުވާލާނެކަމަށް ރައީސު ޑޮނާލްޑް ޓްރަމްޕް ވިދާޅުވެފައި ވަނިކޮށް، އެކަމާމެދު މަޝްވަރާކުރެއްވުމަށް ވައިޓް ހައުސްގެ ނޭޝަނަލް ސިކިއުރިޓީ އެޑްވަައިޒަރު ޖޯން ބޯލްޓަން އިއްޔެ މޮސްކޯއަށް ވަޑައިގެންފިއެވެ. އޭނާ ރަޝިޔާގެ އިސް މަސްއޫލުވެރިންނާއެކު ދެދުވަހަށް ދެމިގެންދާ މަޝްވަރާތައް ބާއްވާނެކަމަށް ޚަބަރުލިބެއެެވެ.
ހޮނިހިރު ދުވަހު ނެވާޑާގައި ވާހަކަފުޅު ދައްކަވަމުން ރައީސު ޓްރަމްޕް ވިދާޅުވެފައިވަނީ 1987 ވަނަ އަހަރު އެމެރިކާގެ ރައީސު ރޮނާޑްލް ރޭގަންއާއި އޭރުގެ ރޫސީވިލާތުގެ ރައީސު މީޚާއިލް ގޮރްބަޗޯވްއާ ސޮއިކުރެއްވި އިންޓަމީޑިއެޓް ރޭންޖް ނިއުކުލިޔާ ފޯސަސް ޓްރީޓީ (އައިއެންއެފް) އަކީ އެމެރިކާއަށް ގެއްލުން ހުރި އެއްޗެއް ކަމުގައެވެ. އެ އެއްބަސްވުމުގެ ދަށުން އެމެރިކާއަށް ޔޫރަޕްގައި ނިއުކުލިޔާ މިސައިލް ނުބެހެއްޓޭނެއެވެ.
"އަހަރުމެން ބޭނުން މި ހަތިޔާރު ތަރައްގީކުރަން. އަހަރުމެން މިއުޅެނީ އެ އެއްބަސްވުން ނިމުމަކަށް ގެނެސް، އެ ދޫކޮށްލަން." ރިޕޯޓަރުންނާ ވާހަކަފުޅު ދައްކަވަމުން ޓްރަމްޕް ވިދާޅުވެފައި ވެއެވެ.
ޓްރަަމްޕްގެ މިވާހަކަފުޅުތަކާ ގުޅިގެން ކްރެމްލިންއިން އިއްޔެ ބުނެފައި ވަނީ ފިނިހަނގުރާމައިގެ ދުވަސްވަރުގެ އެންމެ މުހިއްމު އެއްބަސްވުން އެމެރިކާއިން އުވާލައިފިނަމަ، ދުނިޔެ މިހާރަށްވުރެ ނުރައްކާތެރި ތަނަކަށް ބަދަލުވެގެން ދާނެއެވެ.
ޖޯން ބޯލްޓަން އިއްޔެ މޮސްކޯއަށް ވަޑައިގަތީ ނިއުކުލިޔާ އެއްބަސްވުން އުވާލަން އެމެރިކާ ބޭނުންވާކަން ރައީސު ޓްރަމްޕް ހޮނިހިރު ދުވަހު އިއުލާންކުރެއްވުމުގެ ކުރިން ހަމަޖެހިފައި އޮތް ދަތުރުފުޅެއްގައެވެ.
500 ކިލޯމީޓަރާ 5500 ކިލޯމީޓަރާ ދެެމެދު ރާސްތާގެ މިސައިލް ޔޫރަޕްގައި ބެެހެއްޓުން މަނާކުރާ މި އެއްބަސްވުން އުވާލުމުގެ ކުރިން "ދެ ފަހަރު ވިސްނުމަށް" ޗައިނާއިން އިއްޔެ ވަނީ ގޮވާލާފައެވެ. ޗައިނާގެ ޚާރިޖީ ވުޒާރާގެ ތަރުޖަމާނު ބުނީ "އެގޮތަށް ނިންމައިފިނަމަ އޭގެ ނޭދެވޭ އަސަރު އެތައް ގޮތަކުން ކުރާނެ" ކަމުގައެވެ.
މޮސްކޯއަށް ކުރައްވަމުން ގެންދަވާ ދަތުުރުފުޅުގައި ރަޝިޔާގެ ސެކިއުރިޓީ ކައުންސިލްގެ ވެރިޔާ ނިކޮލާއި ޕަޓްރުޝޭވްއާ ޖޯން ބޯލްޓަން އިއްޔެ ބައްދަލުކުރައްވާފައި ވާއިރު، މިއަދު އޭނާ ރަޝިޔާގެ ޚާރިޖީ ވަޒީރު ސަރްގޭ ލަވްރޯވްއާ ބައްދަލުކުރައްވާނެއެވެ.
އިނގިރޭސި ނޫސް ދަ ގާޑިއަން ބުނާ ގޮތުގައި އެމެރިކާ ނިއުކުލިޔާ އެއްބަސްވުން ދޫކޮށްލުމަށް ރައީސު ޓްރަމްޕަށް އެންމެ ބޮޑަށް ބާރުއަޅުއްވާ ބޭފުޅަކީ އޭނާގެ އެޑްވައިޒަރު ޖޯން ބޯލްޓަންއެވެ. ބޯލްޓަން އަކީ ހަތިޔާރު ކޮންޓުރޯލު ކުރުމާ ދެކޮޅު ބޭފުޅެކެވެ.
