ރިޔާސީ އިންތިޚާބު ބާތިލް ކުރާނެ ސަބަބެއްނެތް ކަމަށް ސްޕްރީމްކޯޓުން މިއަދު ހުކުމް ކުރެއްވުމުން އެއަށް އިހުތިރާމް ކުރައްވާ ކަމަށް ގެމަނަފުށީ ދާއިރާގެ ޕީޕީއެމްގެ މެމްބަރު ޖަމީލް އުސްމާން (ޖޭޔޫ) ވިދާޅުވެއްޖެއެވެ.
އޭނާ ވިދާޅުވީ އިބްރާހީމް މުހައްމަދު ސާލިހު ގެ ސަރުކާރުން ހިންގަވާ ތަރައްގީގެ މަޝްރޫއަށް އެހީތެރިކަން ދޭންޖެހޭނެ ކަމަށެވެ. އެފަދަ މަޝްރޫއުތަކަށް އެހީތެރިކަން ފޯރުކޮށް ދެއްވިޔަސް ބިނާކުރަނިވި ފާޑުކިޔުންތަކާއެކު އެ ސަރުކާރަށް ރަނގަޅަށް ފާރަވެރިވުން މުހިންމު ކަމަށެވެ.
"ސްޕްރީމްކޯޓުގެ ނިންމުން އެއީ އެންމެފަހުގެ ނިންމުން. އިބޫ ސާލިހުގެ މި އުފެދޭ ސަރުކާރަށް، ތަރައްގީގެ މަޝްރޫއުތަކުގައި އެހީތެރިކަން ފޯރުކޮށްދިނުމާއެކު ރަނގަޅަށް ފާރަވެރިވުން މުހިންމު،" އޭނާ ވިދާޅުވިއެވެ.
ޖޭޔޫ ވިދާޅުވީ ތަރައްގީގެ ކަންކަމުގައި އިބްރާހީމް މުހައްމަދު ސާލިހުގެ ސަރުކާރަށް އެއްބާރުލެއްވުން ދެއްވިޔަސް ދެންވެސް ކުރިއަށް ވަޑައިގަންނަވާނީ ރައީސް ޔާމީނާއެކު ކަމަށެވެ.
ސެޕްޓެމްބަރ 23 ގައި ބޭއްވި ރިޔާސީ އިންތިޚާބުން ރައީސް ޔާމީން ބަލިވެ ވަޑައިގެންނެވުމުން އެމަނިކުފާނުވަނީ ބަލި ގަބޫލުވެސް ކުރައްވައިފައެވެ. އެހެންނަމަވެސް ފަހުންވަނީ އިންތިޚާބު ގަޑުމަޑުކޮށްފައި ކަމަށް ވިދާޅުވެ އިލެކްޝަންސް ކޮމިޝަނާ ދެކޮޅަށް ސްޕްރީމް ކޯޓަށް މައްސަލަ ހުށަހަޅުއްވައިފައެވެ. އެމަނިކުފާނު ހުށަހެޅުއްވީ އިންތިޚާބު ބާތިލް ކޮށްދެއްވުމަށް އެދިއެވެ. އެހެންނަމަވެސް ސްޕްރީމް ކޯޓުގެ ފަސް ފަނޑިޔާރުންގެ އިއްތިފާހުން ނިންމެވީ ބާތިލް ނުކުރުމަށެވެ.
