ސެޕްޓެމްބަރު 23 ވަނަ ދުވަހު ރާއްޖޭގައި އޮތް ރިޔާސީ އިންތިޚާބުގެ ނަތީޖާ އިލެކްޝަން ކޮމިޝަނުން އޮޅުވާލާފައިވާ ކަމަށްބުނެ ރިޔާސީ އިންތިޚާބު ބާތިލު ކޮށްދިނުމަށް އެދި ޕީޕީއެމުން ސުޕްރީމް ކޯޓަށް ވައްދާފައިވާ މައްސަލައިގައި މިއަދު އެ ކޯޓުން އިއްވާ ޙުކުމަކީ ގަބޫލު ނުކުރެވޭ ވަރުގެ ގޯސް ޙުކުމަކަށް ވެއްޖެނަމަ މަގުމައްޗަށް ނުކުންނަންޖެހޭނެ ކަމަށް ކުރީގެ ރައީސް މުޙަންމަދު ނަޝީދު ވިދާޅުވެއްޖެއެވެ.
ދަހިންދޫއަށް ދެއްވި އިންޓަވިއުއެއްގައި ނަޝީދު ވިދާޅުވީ ސުޕްރީމް ކޯޓުން ގޯސް ޙުކުމެއް އިއްވި ނަމަވެސް މަގުތަކަށް ނުކުމެ ހަރަކާތްތައް ހިންގުން ނޫން އިތުރު ގޮތެއް ފެންނަން ނެތް ކަމަށާއި ނަމަވެސް މަގު މައްޗަށް ނުކުތުމަކީ ފަސޭހަ ކަމަކަށްނުވާނެ ކަމަށެވެ. އަދި މަގުމައްޗަށް ނުކުމެއްޖެނަމަ އިތުރަށް ވަރުގަދަ ފިޔަވަޅު އަޅައި ވެރިކަން ބާރުގަދަ ކުރުމުގެ ފުރުޞަތުވެސް ރައީސް ޔާމީނަށް ލިބިވަޑައިގަންނަވާނެ ކަމަށް ނަޝީދު ވިދާޅުވިއެވެ.
އިންތިޚާބާ ގުޅޭގޮތުން ސުޕްރީމް ކޯޓަށް ޕީޕީއެމުން ވެއްދި މައްސަލައިގައި މިއަދު އޮތީ ޙުކުމް އިއްވުމެވެ. ގިނަބަޔަކު މިހާރު އިންތިޒާރު ކުރަމުން އަންނަނީ ސުޕްރީމް ކޯޓުން މިއަދު އިއްވާނެ ހުކުމަކަށެވެ.
އިދިކޮޅު ކޯލިޝަނުންނާއި އިލެކްޝަން ކޮމިޝަނުން ބުނަނީ އިންތިޚާބު ބާތިލު ކުރަންޖެހޭވަރުގެ އެއްވެސް ހެއްކެއް ޕީޕީއެމަށް ދެއްކިފައި ނެތް ކަމަށެވެ. ނަމަވެސް ޕީޕީއެމުން ދަނީ އިންތިޚާބުގެ ނަތީޖާ އިލެކްޝަން ކޮމިޝަނުން އޮޅުވާލި ކަމަށް ތަކުރާރުކޮށް ތުހުމަތު ކުރަމުންނެވެ.
