އަފްޣާނިސްތާނުގައި އިއްޔެ ބޭއްވި އާއްމު އިންތިޚާބުގެ ތެރޭގައި ދެވުނު ހަމަލާތަކުގައި މަދުވެގެން 36 މީހުން މަރުވެ 150 އެއްހާ މީހުން ޒަޚަމްވެފައިވާއިރު، އިދާރީ މައްސަލަަތައް ދިމާވުމާއި، އޮފިޝަލުން ހާޒިރުނުވުމުގެ ސަބަބުން ވޯޓުލާ އެތައް މަރުކަޒެއް ހުޅުވުނީ އެތައް ގަޑިއިރެއް ފަހުންނެވެ. އަދި ވޯޓުލާ ބައެއް މަރުކަޒުތައް އެއްގޮތަކަށްވެސް ހުޅުވާފައި ނުވެއެވެ.
އެންމެ ލޭ އޮހޮރުވުން ބޮޑު އެއް ހަމަލާގައި، ކާބުލްގެ ވޯޓުލާ މަރުކަޒަކަށް މީހަކު ޖާނުން ފިދާވެގެން ދިން ހަމަލާއެެއްގައި 15 މީހުން މަރުވެ 20 މީހުން ޒަޚަމްވެފައި ވެއެވެ. މަރުވި މީހުންގެ ތެރޭގައި ހިމެނެނީ އާއްމުންގެ 10 މީހުންނާއި 5 ފުލުހުންނެވެ.
ނުރައްކާތެރި ހާލަތުގައި ވޯޓުލާން ޖެހުނަސް، އަންދާޒާކުރިވަރަށްވުރެ ގިނަ ބަޔަކު ވޯޓުލާން ނުކުތެވެ. އެހެންވެ، ވޯޓުލާ މަރުކަޒުތަކުގައި ދިގު ކިއޫތަކެއް އޮތެވެ.
އަތު ބޮމާއި، ޕެޓްރޯލް ބޮން ބޭނުންކޮށްގެން ގާތްގަނޑަަކަށް 193 ހަމަލާ ދީފައިވާއިރު ގިނަ ހަމަލާތައް ސީދާ ވޯޓުލާ މީހުންނަށް އަމާޒުކޮށްފައި ނުވެއެވެ. ބޭނުމަކީ މީހުން މެރުމަށްވުރެ ބޮޑަށް މީހުން ބިރުގަންނަވައިގެން ވޯޓުލާން ނުނުކުންނަ ގޮޮތް ހެދުން ކަމަށް ބެލެވެއެވެ.
ވޯޓުލާން ފެށުމުގެ ކުރިންވެސް އިންތިޚާބުގައި ވާދަކުރާ ކެންޑިޑޭޓުންނަށް އަމާޒުކޮށްވެސް ހަމަލާދީފައި ވެއެވެ. މިގޮތުން އިންތިޚާބުގައި ވާދަކުރި 2500 ކެންޑިޑޭޓުންގެ ތެރެއިން 10 މީހަކަށް ހަމަލާދީ މަރާލާފައި ވެއެވެ.
ފުރަތަމަ ހިސާބުތައް ދައްކާ ގޮތުން އަފްޣާނިސްތާނުގެ 27 ޕްރޮވިންސެއްގައި ވޯޓުލާން ރަޖިސްޓަރީކޮށްފައިވާ 9 މިލިއަން މީހުންގެ ތެރެއިން 1.5 މިލިއަން މީހުން ވޯޓުލާން ނުކުތެވެ. ގައުމުގެ ސަލަމާތީ ކަންކަން އޮތް ހާލަތަށް ބަލާއިރު މިއީ ރަނގަޅު އަދަދެއް ކަމުގައި ބެލެއެވެ.
އާއްމުންނަށް ވޯޓުލުމުގެ ފުރުސަތު ލިބުނު މަރުކަޒުތަކުގެ ވޯޓު ރޭ ގުނަން ފަށާފައި ވާއިރު، އިއްޔެ ވޯޓުލުން ކުރިއަށް ނުގެންދެވުނު 371 މަރުކަޒެއްގައި މިއަދު (އާދީއްތަ ދުވަހު) ވޯޓުލުން ކުރިއަށް ގެންދާނެއެވެ.
އަފްޣާނިސްތާނުގެ ގާނޫނުހަދާ މަޖިލީހުގެ 294 ގޮނޑިއަށް މެންބަރުން ހޮވަން ލީ ވޯޓުގެ ނަތީޖާ ލިބޭވަރު ވާނީ ނޮވެންބަރު މަހުގެ 10 ވަނަ ދުވަހު ކަމަށް ޚަބަރުތައް ބުނެއެވެ.
