އިބްރާހިމް މުޙަންމަދު ސޯލިޙްގެ ސަރުކާރުގެ އިކޮނިމިކް މިނިސްޓަރު ކަމަށް ޝައުގުވެރިކަން ފާޅު ކުރެއްވުމާއެކު ވިޔަފާރިވެރިޔާ އަބްދުﷲ ޖާބިރަށް ގިނަބަޔެއްގެ ފާޑުކިޔުން އަމާޒުވާން ފަށައިފިއެވެ.
މީގެކުރިން ޓީވީ ޗެނަލެއްގައިވެސް އިކޮނޮމިކް މިނިސްޓަރު ކަމަށް ވަޑައިގަތުމަށް ޝައުގުވެރިކަން ފާޅު ކުރެއްވުމާއެކު ޖާބިރަށް އަމާޒުވި ފާޑުކިޔުންތައް ބޮޑު ވެގެންދިޔައީ ޖާބިރު ފަހުން ކުރެއްވި ޓްވީޓަކާއި ގުޅިގެންނެވެ. ޖާބިރު ކުރެއްވި ޓްވީޓުގައި ވިދާޅުވެފައި ވަނީ އޭނާގެ އިކޮނޮމިކް މިނިސްޓަރު ކަމުގެ ދަށުން ރައްޔިތުން "ރަނުން ޖަރީ ކުރާނަން" ކަމަށެވެ. އަދި ޑޮލަރުގެ އަގު މިހާރަށްވުރެ ދަށްކޮށް، ދިވެހިން ޑޮލަރަށް ސަލާން ޖަހަން ނުޖެހޭފަދަ ދުވަސްތަކެއް ގެންނާނެ ކަމަށެވެ. ޖާބިރު ޓްވީޓު ނިންމާލައްވަމުން ވިދާޅުވެފައި ވަނީ އޭނާގެ އިކޮނޮމިކް މިނިސްޓަރު ކަމުގެ ދަށުގައި ދިވެހި ރައްޔިތުން އުޅޭނީ "ފައިވް ސްޓާރ ފެންވަރުގައި" ކަމަށެވެ.
ޖާބިރުގެ މި ޓްވީޓާއެކު ރުޅިގަދަވެ ޖާބިރަށް ސޯޝަލް މީޑިޔާގައި ފާޑުކިޔުން އަމާޒު ކުރަމުން އަންނަ މީހުންގެ ތެރޭގައި ކޯލިޝަނުގެ ސަޕޯޓަރުންވެސް ވަރަށްގިނައެވެ. ބަޔެއް މީހުން ބުނެފައި ވަނީ ޖާބިރަކީ ވިޔަފާރި ކުރަން ބަހައްޓަންވީ ބޭފުޅެއް ކަމަށާއި ޖާބިރު އެންމެ ރަނގަޅު ވާނީ ދައުލަތާއި އެނޫންވެސް ފަރާތްތަކަށް ދައްކަވަންޖެހޭ ދަރަނިތައް ނިންމައި ޚަލާސް ކުރެއްވުން ކަމަށެވެ.
ސޯޝަލް މީޑިޔާގައި ޖާބިރަށް ފާޑު ކިޔަމުން ކޯލިޝަނަށް ނިސްބަތްވާ ބަޔެއް މީހުން ބުނެފައި ވަނީ އިބްރާހިމް މުޙަންމަދު ސޯލިޙްއަކީ ނަޒާހަތްތެރި ބޭފުޅެއް ކަމަށްވާއިރު އެ ކެބިނެޓަށް ވަޑައިގަންނަވަން ޖެހޭނީވެސް ނަޒާހަތްތެރި ބޭފުޅުން ކަމަށެވެ. ނަމަވެސް ޖާބިރަކީ އެފަދަ ނަޒާހަތްތެރި ބޭފުޅެއް ނޫންކަމަށް ބުނެ މީގެކުރިން ހިނގައިދިޔަ ބަޔެއް ހާދިސާތައްވެސް ސޯޝަލް މީޑިޔާގައި ބަޔެއް މީހުން އަންނަނީ ދައްކަމުންނެވެ.
އިބްރާހިމް މުޙަންމަދު ސޯލިޙްގެ ވަޒީރު ކަމަށް ޖާބިރު ހަމަޖެއްސުމާ ދެކޮޅަށް ވާހަކަ ދެއްކި ބަޔެއް މީހުން ބުނެފައި ވަނީ ރައީސް ޔާމީންގެ ސަރުކާރު ބަދަލު ކުރުމަށް ޖާބިރު ކުރެއްވި މަސައްކަތުގެ އިނާމެއްގެ ގޮތުން ސީދާ ޖާބިރަށް ވަޒީރުކަން ދެއްވުމުގެ ބަދަލުގައި އެންމެ ރީތިގޮތަކީ ޖާބިރުގެ އަނބިކަނބަލުން އަދި ކުރީގެ ބަންޑާރަ ނައިބު ދިޔާނާ ސައީދަށް ކެބިނެޓުން ޖާގަ ދެއްވުން ކަމަށެވެ.
ބަޔެއް މީހުން ބުނެފައި ވަނީ ޖާބިރަކީ ވިޔަފާރިވެރިއަކަށް ވެފައި، ޖާބިރުގެ މަސްލަހަތު ވަރަށް ބޮޑަށް ވިޔަފާރިއާ ގުޅުން ހުރި ކަންކަމުގައި ހުރުމާއެކު، މިހުރިހާ ކަމަކަށްވެސް އިބްރާހިމް މުޙަންމަދު ސޯލިޙް ބައްލަވާނެ ކަމަށް އުންމީދު ކުރައްވާ ކަމަށެވެ.
އިބޫއަށް އޮންނަ ތާއިދު ގެންދާނަން. މިއީ ކަމުދާ މީހެއް ނޫން