އިންތިޚާބު ތަކުގައި ކާމިޔާބީ ހޯދުމަށްޓަކައި ތަންފީޒު ކުރަންޖެހޭ ހަމައެކަނި އެއްޗަކީ ތަރައްގީ ނޫން ކަމަށް ކުރީގެ ރައީސް މުޙަންމަދު ނަޝީދު ވިދާޅުވެއްޖެއެވެ.
އިނގިރޭސިވިލާތުގެ އެސްއޯއޭއެސް ޔުނިވާސިޓީގައި ދެއްވި ތަގުރީރުގައި ނިމިދިޔަ ރިޔާސީ އިންތިޚާބުގައި ރައީސް އަބްދުﷲ ޔާމީންގެ ޓީމުން ކެމްޕޭނުގައި އެންމެ ބޮޑަށް ދައްކަމުން އައީ ތަރައްގީ ގެނެސްދެއްވާފައިވާ ވާހަކަ ކަމަށްވާތީ އެކަމަށް އިޝާރާތް ކުރައްވައި ނަޝީދު ވިދާޅުވީ ރައްޔިތުންގެ މައްޗަށް ހަމައެކަނި ތަރައްގީ ތަންފީޒު ކޮށްގެން ކެމްޕޭނެއްގައި ފުއްދާލެވެން ނޯންނާނެ ކަމަށާއި ކެމްޕޭނެއްގައި ތަރައްގީއަށްވުރެވެސް މާމުހިންމު ކަންތައްތަކެއް ހުންނާނެ ކަމަށެވެ.
"އެއީ އެމީހުންގެ ވާހަކަތައް އަޑުއެހުން، ޑޯޓުޑޯއަށް ދިއުން، އެމީހުންނާއި ވާހަކަދެއްކުން، އަދި ރައްޔިތުންގެ ބޭނުންތައް ދެނެގަތުން" ނަޝީދު ވިދާޅުވިއެވެ.
ނަޝީދު ވިދާޅުވީ ނިމިދިޔަ ރިޔާސީ އިންތިޚާބުން ރައީސް އަބްދުﷲ ޔާމީންއަށް ނާކާމިޔާބާ ކުރިމަތިވެ ވަޑައިގެންނެވީ ރައްޔިތުންގެ އިޙްސާސްތައް އެނގިވަޑައިނުގެންނެވުމުން ކަމަށެވެ. ނަޝީދު ވިދާޅުވީ ރާއްޖެ ވަޑައިނުގެންނެވި އެހެން ގައުމެއްގައި އަރުވާލެވިގެން ހުންނެވުމަކީ އެމަނިކުފާނަށްވެސް ފަސޭހަފުޅު ކަމެއް ނޫން ކަމަށާއި އިނގިރޭސިންގެ ޙިމާޔަތުގައި ހުންނަވައިގެންވެސް ސިޔާސީ ގޮތުން ކުރެއްވުނީ ރާއްޖެއަށް މުހިންމު މަސައްކަތްތަކެއް ކަމަށެވެ.
އެގޮތުން ސަރުކާރުން ހިންގަމުން އައި ޚިޔާނާތުގެ ކަންކަމުގެ ހެކިތައް އެއްކޮށް އެފަދަ ކޮރަޕްޝަންތައް ފަޅާއަރުވާލެވި، ބޭރުގައި ތިއްބަވައިގެންވެސް ރާއްޖޭގެ ސިޔާސީ އިސްބޭފުޅުންނާ ބައްދަލު ކުރައްވަމުން ގެންދެވި ކަމަށެވެ.
