ހުވަދުއަތޮޅު ދެކުނުބުރީ ފަރެސްމާތޮޑާ އިންޖީނުގެއިން ބޭރުވާ ދުން އެރަށު ސްކޫލަށް ވަންނަމުންދާތީ ކިޔެވުމަށް ދަތިވަމުންދާ ކަމަށް ބައެއް ބެލެނިވެރިން ބުނެފިއެވެ.
އެރަށުގައި ހިންގާ ހުވަދޫ ސްކޫލާއި އިންޖީނުގެ ހުންނަވަނީ ވަރަށް ކައިރީގައި ކަމުން އިންޖީނުގެއިން ބޭރުވާ ދުން ބައެއްފަހަރު ސްކޫލްތެރެއަށް ވަދެއެވެ. "މިހާރުވެސް ދުމުގެ އަސަރު ވަރަށްބޮޑަށް ކުރަމުންދޭ. އެހެންނަމަވެސް ސްކޫލުގެ ކިޔެވުން ބަންދުކުރާ ވަރަށް އޭގެ އަސަރު ނުކުރޭ. މީގެ ކުރިން އެބަހުރި ކިޔެމުން ބަންދުކޮށްފައި ވެސް. އަދި ބެލެނިވެރިން ނުކުމުގެ ސްކޫލް ބަންދުކޮށްފައި ވެސް ވޭ،" ބެލެނިވެރިއަކު ބުންޏެވެ.
ދުމުގެ އަސަރު ކުރާއިރު އޭގެ ވަސް ޖެހިގެން ދަތިވަނީ ހަމައެކަނި ކިޔަވާ ކުދިންނަށް ވެސް ނޫނެވެ. ކިޔަވާ ކުދިންގެ އިތުރަށް ޓީޗަރުންނާއި އެތަނުގެ އެހެނިހެން މުވައްޒަފުންނަށް ވެސް އޭގެ އުނދަގޫ ފޯރަމުން ދެއެވެ. "އިރުވައި ތެރޭގައި ބޮޑަށް ދުމުގެ އަސަރުކުރަނީ. ރޭ ވެސް ދުމުގެ އަސަރު ވަރަށްބޮޑަށްކުރި. މޭ ނުބައިކޮށް ބޮލުގައި ރިއްސައި ހޮޑުލެވޭގޮތްވި. ހިތަށް އަރަނީ އެތަނުގައި ކިޔަވާ ކުދިންނާއި ޓީޗަރުންނަށް ކިހާވަރެއްވާނެ ބާވައޭ،" ހުވަދޫ ސްކޫލުގެ ވޮޗަރަކު ބުންޏެވެ.
ބައެއް ޓީޗަރުން ބުނިގޮތުގައި މިދުވަސްވަރަކީ އޯލެވެލް އިމްތިހާން ކުރިއަށްދާ ދުވަސްވަރު ކަމުން ދުމުގެ އަސަރު މާބޮޑަށްކޮށްފާނެތީ އެކަމާ ކަންބޮޑުވާ ކަމަށެވެ. އެހެންނަމަވެސް މިހާރުވެސް ކޮންމެވެސް ވަރަކަށް ދުމުގެ އުނދަގޫ ވަމުންދާ ކަމަށް ޓީޗަރުން ބުންޏެވެ. "މީގެ ކުރިން ދުމުގެ އަސަރުކޮށް ބައެއް ޓީޗަރުން ވަނީ ނޭވާ ހާސްވެ، ބޯ އަނބުރައި ހޮޑުވެސް ލައިފައި. ދަރިވަރުން ބަލާ ރޭ ސްކޫލަށްދިޔަ ބައެއް ބެލެނިވެރިންވެސް ވަނީ ދުމުގެ އަސަރުކުރާ ކަމަށް ބުނެ ޝަކުވާކޮށްފައި،" ޓީޗަރަކު ބުންޏެވެ.
ސްކޫލަށް ކުދިންބަލައި ދިޔަ ބައެއް ބެލެނިވެރިން ރޭ ބުނެފައިވަނީ ސްކޫލް ކައިރީގައި ނުތިބެވިގެން ދުރަށްދިޔަކަމަށެވެ. ދުމުގެ އަސަރު ކުރުމުގެ ސަބަބުން ބައެއް ކުދިންނާއި ބެލެނިވެރިން ކެއްސައި ބޯއަނބުރާތީވެސް އުޅުނެވެ.
މީގެ ކުރިން އެ މައްސަލަ ދިމާވެ ދެފަހަރެއްގެ މަތިން ކިޔެވުން ހުއްޓާލަން ޖެހިފައި ވެއެވެ. އެފަހަރު ބެލެނިވެރިން ވަނީ ޕީޓީއޭ މެދުވެރިކޮށް އެޑިޔުކޭޝަން މިނިސްޓްރީއަށް ރިޕޯޓެއް ވެސް ފޮނުވައިފައި ކަމަށް މައުލޫމާތު ލިބިފައިވެއެވެ. އެހެންނަމަވެސް އޭގެ ޚަބަރެއް އަދި ލިބިފައެއް ނުވެއެވެ. އޭގެ ފަހުން ގާތްގަނޑަކަށް 4 ވަރަކަށް މަސް ވެދާނެ ކަމަށް ބައެއް ބެލެނިވެރިން ބުންޏެވެ. އެ މައްސަލަ ހައްލުކުރުމުގެ މަސައްކަތް ކަމާބެހޭ ފަރާތްތަކުން ފެށި ކަމަށާއި އެހެންނަމަވެސް އެ މަސައްކަތް ކޮންމެ ވެސް ސަބަބުތަކާހެދި މަޑުޖެހިފައިވާ ކަމަށް ބައެއް ބެލެނިވެރިން ރޭ ބުންޏެވެ.
އިޖީނުގެއިން ދުން ބޭރުވުމަކީ އާންމު ކަމެއްނޫނެވެ. "މިހާރު މައްސަލަ ދިމާވާން ފެށީ ފެނާއެކުހުރި ތެޔޮ އިންޖީނަށް އެޅިގެން ކަމަށް މައުލޫމާތު ލިބިފައިވަނީ. އޭގެ ސަބަބުން އިންޖީނުގެ ކޮންމެވެސް ބައެއް ހަލާކުވެފައިވަނީ. އޭގެ ސަބަބުން އިންޖީނުތަކުން އެވަރަށް ދުން ބޭރުވަމުންދަނީ. އެމައްސަލަ ހައްލުކުރަން ކުރާ މަސައްކަތް އަވަސްކުރާތަނެއް ނުފެނޭ. މައްސަލަ ޖެހިފައިވާ ބައި ނުވަތަ އެއްޗެއް ބަދަލުކުރުމުން ދުމުގެ މައްސަލަ ހައްލުވެދާނެ ކަމަށްވަނީ. އެކަމަކު އަދި މިދަނީ ހައްލެއްނުލިބި،" ބެލެނިވެރިއަކު ބުންޏެވެ.
މިމައްސަލާގައި ފެނަ ކޯޕަރޭޝަންގެ ބަހެއް ލިބޭ ގޮތެއް ނުވިއެވެ.
