ޔޫރަޕުގައި އެންމެ ފަހުން މިނިވަންކަން އިއުލާންކުރި ގައުމު ކޮސޯވޯގެ ސަބް ދަރިކޮޅަށް ނިސްބަތްވާ މީހުން ދެކޮޅުހަދަމުން ދަނިކޮށް އެގައުމުގެ ގާނޫނުހަދާ މަޖިލީހުން 5000 ސިފައިންގެ މައްޗަށް އެކުލެވޭ ގައުމީ އަސްކަރިއްޔާއެއް އުފައްދަން ފާސްކޮށްފިއެވެ. ސާބު ދަރިކޮޅުގެ މީހުން ބުނަނީ އެއީ ޣައިރު ގާނޫނީ ނިންމުމެއް ކަމުގައެެވެ.
ގާނޫނު ހަދާމަޖިލީހުގައި ތިބި ކޮސޯވޯއަކީ މިނިވަން ދައުލަތެއްކަން ގަބޫލުނުކުރާ ސާބިޔާގެ ތާއީދު ލިބިފައިވާ ސާބު ދަރިކޮޅުގެ މެންބަރުން ވަނީ ކުރިން އެކަން ފާސްކުރަން އުޅުނު ފަހަރުތަކުގައި އެކަން ހުއްޓުވާފައެވެ. އެމީހުން ބުނަނީ ކޮސޯވޯގެ ގާނޫނު އަސާސީއަށް ބަދަލުގެނެސްގެން ނޫނީ އެފަދަ ކަމެއް ފާސްނުކުރެވޭނެ ކަމުގައެވެ.
ސަރުކާރުން މިއަދު (ބުރާސްފަތި ދުވަހު) ގާނޫނުހަދާ މަޖިލީހަށް ހުށަހަޅައިގެން ފާސްކުރި ތިން ބިލުން، މިހާރު ލުއި ހަތިޔާރު ގެންގުޅޭ ކޮސޯވޯ ސެކިއުރިޓީ ފޯސް (ކޭއެސްއެފް) ގައުމީ ސިފައިންނަށް ބަދަލުވެގެންދާނެއެވެ. ސަރުކާރުން ބުނީ މިކަން މިގޮތަށް ކުރަން ގާނޫނު އަސާސީއަށް ބަދަލުގެންނަން ނުޖެހޭ ކަމަށެވެ.
މި ބިލުތައް ފާސްކުރަން ނެގި ވޯޓު 120 މެންބަރުން ހިމެނޭ މަޖިލީހުން ފާސްކުރީ 98 ވޯޓުގެ އަޣުލަބިއްޔަތުންނެވެ. މަޖިލީހުގައި ހިމެނޭ ސާބު ދަރިކޮޅުގެ 11 މެންބަރުން އެ ވޯޓުގައި ބައިވެރިނުވެއެވެ. މާގިނަ ދުވަހެއް ނުވެ މިކަމާމެދު އިތުރު ވޯޓެއް ނަގާނެއެވެ.
"ތިން ގާނޫނުގެ މަގްސަދަކީ އެކައްޗެއް. އެއީ ކޮސޯވޯގެ ސަރަހައްދުގެ އެއްބައިވަންތަކަން ރައްކާތެރިކުރުމާއި، ކޮސޯވޯގައި ދިރިއުޅޭ ހުރިހާ ނަސްލެއްގެ މީހުން ރައްކާތެރިކުރުން." ވޯޓުގެ ކުރިން ވާހަކަފުޅުދައްކަވަމުން ބޮޑުވަޒީރު ރަމޫޝް ހަރަދިނާއި ވިދާޅުވެފައި ވެއެވެ.
2008 ވަނަ އަހަރު މިނިވަންކަން އިއުލާންކުރި، 1.8 މިިލިއަން މީހުންގެ އާބާދީއެއް އޮންނަ ކޮސޯވޯގެ ރައްކާތެރިކަން ކަށަވަރުކޮށްދެނީ އެގައުމުގައި ތިބި ނޭޓޯގެ 4000 ސިފައިންނެވެ.
އެމެރިކާއާއި ޔޫރަޕިއަން ޔުނިއަން (އީޔޫ) ގެ މެންބަރު ގިނަ ގައުމުތަކުން ކޮސޯވޯ މިނިވަން ދައުލަތެއްގެ ގޮތުގައި ބަލައިގަތް ނަމަވެސް އދ.ގެ ސަލާމަތީ މަޖިލީހުގައި ހިމެނޭ ވީޓޯކުރުމުގެ ބާރު ލިބިފައިވާ ރަޝިޔާއާއި ޗައިނާއިން ދެކޮޅު ހަދާތީ ކޮސޯވޯއަށް ވަނީ އދ. މެންބަރުކަން ނުލިބިއެވެ.
އަލަށް ފާސްކުރި ގާނޫނުތައް ބުނާގޮތުގައި ކޮސޯވޯގައި އަމަލީގޮތުން ހަރަކާތްތެރިވާ 5000 ސިފައިންނާއި، ރިޒާވް 3000 ސިފައިން ހިމެނޭ ގައުމީ ސިފައިންގެ ލަޝްކަރެއް އޮންނަން ވާނެއެވެ.
