ސެޕްޓެމްބަރ 23 ގައި ރާއްޖޭގައި ބޭއްވި ރީޔާސީ އިންތިޚާބު ގަނޑުބަޑު ކޮށްފައިވާ ކަމަށް ވިދާޅުވެ އެ އިންތިޚާބު ބާތިލް ކޮށް ދެއްވުމަށް އެދި ރައީސް ޔާމީންގެ ފަރާތްޕުޅުން ސްޕްރީމް ކޯޓަށް ހުށަހެޅުއްވި މައްސަލައިގެ ފަހު އަޑުއެހުން މިއަދު ބާއްވައިފިއެވެ.
މިއަދުގެ އަޑު އެހުމުގައި ވަނީ ރައީސް ޔާމީންގެ ފަރާތްޕުޅުން ހުށަހަޅައިފައިވާ ސިއްރު ހެކި ނެގުމާބެހޭ ގޮތުން ގޮތެއް ނިންމެވުމެވެ. ސްޕްރީމް ކޯޓުގެ ފަސް ފަނޑިޔާރުން މިއަދު ނިންމެވީ ރައީށް ޔާމީންގެ ފަރާތްޕުޅުން ހުށަހެޅުއްވި ސިއްރު ހެކި ނަގަންޖެހޭ ސަބަބެއް ނެތް ކަމަށެވެ. އެހެން ކަމުން މިއަދުގެ އަޑު އެހުން ނިންމެވީ ސިއްރު ހެކި ނުނަގައެވެ.
މިއަދުގެ އަޑުއެހުމުގައި ވަނީ މިމައްސަލައިގެ ތެރެއަށް އިދިކޮޅުން ތަދައްޚުލުވި ފަރާތްތަކުގެ ވެސް ފަހު ބަސް ނަގައިފައެވެ. އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ ވިދާޅުވީ މިމައްސަލައިގެ އަޑު އެހުންތައް މިހާރު ނިމުނީ ކަމަށެވ. މައްސަލަ ދިރާސާ ކުރަމުންދާއިރު އިތުރު ކަމެއް ސާފުކުރަން ނުޖެހޭ ކަމަށްވާނަމަ ދެން އޮންނާނީ ހުކުމް އިއްވުން ކަމަށް ވެސް އޭނާ ވިދާޅުވިއެވެ. އެހެންނަމަވެސް ހުކުމް އިއްވާނެ ދުވަހެއް ވިދާޅެއް ނުވެއެވެ.
