ރިޔާސީ އިންތިޚާބު ބާތިލްކޮށް ދެއްވުމަށް އެދި ރައީސް އަބްދުﷲ ޔާމީންގެ ފަރާތްޕުޅުން ސްޕްރީމް ކޯޓަށް މައްސަލަ ހުށަހެޅުއްވީ އެމަނިކުފާނަށް ބަލި ގަބޫލު ނުކުރެވިގެން ކަމަށް މި މައްސަލާގައި އިދިކޮޅުން ވަކާލާތު ކުރައްވާ އެއް ވަކީލު ހިސާން ހުސައިން ވިދާޅުވެއްޖެއެވެ.
ޝަރީއަތުގެ މިއަދުގެ އަޑުއެހުން ނިންމަވާލެއްވުމަށްފަހު ބޭރަށް ނުކުމެ ވަޑައިގެން ނޫސްވެރިންނަށް މައުލޫމާތު ދެއްވަމުން ހިސާން ވިދާޅުވީ ކުރިން ވެސް ދެންނެވި ފަދައިން މިމައްސަލައަކީ "ރައީސް ޔާމީނަށް ބަލި ގަބޫލު ނުކުރެއްވިގެން" ހުށަހެޅުއްވި މައްސަލައެއް ކަމަށެވެ.
ހިސާން ވިދާޅުވީ މި މައްސަލަ ހުށަހަޅުއްވައިފައިވަނީ ދޫސްތޫރީ މައްސަލައެއްގެ ގޮތުގައި ކަމަށް ރައީސް ޔާމީންގެ ފަރާތްޕުޅުން މިއަދުވެސް ވިދާޅުވަމުން ގެންދެވި ކަމަށެވެ. އެހެންނަމަވެސް "އަޅުގަނޑުމެންނަށް ލިބުނު ފުރުސަތުގައި އަޅުގަނޑުމެން ދެންނެވިން ގާނޫނު އަސާސީގެ ހަތްދިހަ ދެވަނަ މާއްދާއަށްބަލާއިރު މިއީ ދުސްތޫރީ މައްސަލައެއް ކަމަށް އަޅުގަނޑުމެންނަށް ގަބޫލު ނުކުރެވޭ ކަމަށް. އެހެންނަމަވެސް މިއަދުގެ ޝަރީއަތް ޗެއާކުރެއްވި އިއްޒަތްތެރި އުއްތަމަ ފަނޑިޔާރު ވިދާޅުވީ މިއީ ދުސްތޫރީ މައްސަލައެއް ކަމަށް ނިންމަވާފައިވާ ކަމަށް،" ހިސާން ވިދާޅުވިއެވެ.
މިއަދުގެ އަޑުއެހުން ނިންމާލަމުން މި މައްސަލައަކީ ރައީސް ޔާމީނަށް ބަލި ގަބޫލު ނުކުރެވިގެން ހުށަހެޅުއްވި މައްސަލައެއް ކަމަށް ދެންނެވި ކަމަށް ހިސާން ވިދާޅުވިއެވެ. "މައްސަލައިގެ އަސާސްތަކެއްގެ ގޮތުގައި ބަޔާން ކޮށްފައި މިއޮންނަނީ ދެލިފޮހެވޭ ގަލަމަކާއި، ލިޔެވޭ އަނގޮނޓިއަކާއި، ފާހަގަޖެހުމުން ފޮހެވޭ ވޯޓުކަރުދާސް ތަކެއްގެ ވާހަކަކަން. މީގައި މަދީ އުދުހޭ މުސައްލައެއް އެކަނި،" ހިސާން ވިދާޅުވިއެވެ.
ހިސާން ވިދާޅުވީ އެއްވެސް ހެއްކެއް ގަރީނާއެއް އަދި ރައީސް ޔާމީންގެ ފަރާތްޕުޅުން ކުރައްވާ ތުހުމަތުތަކާ ބެހޭ އެއްވެސް ދަލީލެއްނެތި މިފަދަ މައްސަލައެއް ސްޕްރީމް ކޯޓަށް ހުށަހަޅައިގެން ކުރިއަށް ގެންދިޔުމަކީ ދިވެހި ރައްޔިތުންގެ އިތުރަށް ގުޅިފައިވާ ޕާޓީތަކުން ކަންބޮޑުވާ ކަމެއްކަމަށް ހިސާން ވިދާޅުވިއެވެ.
އޭނާ މިއަދުވެސް ތަކުރާރުކޮށް ވިދާޅުވެފައިވަނީ ވޯޓަށް އެއްވެސް އަސަރެއް ކޮށްފާނެ ކަމުގެ ހެއްކެއް އަދި ގަރީނާއެއްވެސް ކޯޓަށް ހުށަހެޅިފައި ނުވާކަމަށެވެ. އެހެން ކަމުން އެމައްސަލަ އިތުރަށް ކުރިއަށް ނުގެންގޮސް މައްސަލަ ބާތިލް ކޮށްދެއްވުމަށް އެދި ވަޑައިގެންނެވި ކަމަށް ވެސް ހިސާން ވިދާޅުވިއެވެ.
ހިސާން ވިދާޅުވީ ރައީސް ޔާމީންގެ ފަރާތްޕުޅުން ހުށަހަޅުއްވާ ސިއްރު ހެކިންނާ ބެހޭގޮތުން މާދަމާ ގޮތެއް ނިންމަވާނެ ކަމަށެވެ. އިތުރަށް ކުރިއަށްދާން އެނގިވަޑައި ގަންނަވާނީ މާދަމާ ނިންމަވާ ގޮތަކުން ކަމަށް ވެސް ހިސާން ވިދާޅުވިއެވެ.
