3:45 މިއަދުގެ ޝަރީއަތުގެ މަޖިލީސް ނިންމަވައިފި. މާދަމާއޮންނާނީ އެންނެ ފަހުގެ އަޑުއެހުން. ސިއްރު ހެކި ބަލައިގަތުމާމެދު މާދަން ގޮތެއް ނިންމަވާނެ.
މިއަދުގެ ޝަރީއަތުގެ މަޖިލީހުގައ ރައީސް ޔާމީންގެ ފަރާތްޕުޅުން ވާހަކަ ދެއްކެވި ހައިކޯޓުގެ ކުރީގެ ފަނޑިޔާރު އައްބާސް ޝަރީފް ވިދާޅުވީ އިލެކްޝަންސް ކޮމިޝަނުންވަނީ ގަސްތުގައި ކޮމްޕްލެއިންޓްސް ބިއުރޯގެ މަސައްކަތް ހުއްޓުވައިފައި ކަމަށެވެ. އަދި ޝަކުވާތައް ވެސް ބަލައިގަނެފައި ނުވާކަމަށް އޭނާ ވިދާޅުވިއެވެ. އެއަށް ރައްދު ދެއްވައި އިލެކްޝަންސް ކޮމިޝަންގެ ވަކީލް ހުސައިން ޝަމީމް ވިދާޅުވީ އެއީ އެއްވެސް އަސްލެއްނެތް ވާހަކަ ތަކެއް ކަމަށެވެ. އެތަނަށް ހުށަހެޅިނަމަ ހުށަހެޅި ހުރިހާ ޝަކުވާއެއްވެސް ބަލައިގެންފައިވާނެ ކަމަށާއި އެ އަދަދު ވެސް އޭނާ ވަނީ ޝަރީއަތުގައި ހާމަކުރައްވައިފައެވެ.
ޝަރީފް ދެއްކެވި ވާހަކައިގައި ވޯޓު ކަރުދާސް ޗާޕްކުރަން ނޮވެލްޓީއަށް ދިނުމުގެ ބަދަލުގައި އެމް 7 އަށް ދީފައިވާ މައްސަލަ ފާހަގަ ކުރެއްވިއެވެ. އޭނާ ވިދާޅުވީ އެމް 7 ގެ ބަދަލުގައި ނޮވެލްޓީން ޗާޕުކުރިނަމަ ސަލާމަތީ ފީޗާސްތައް މާގިނައިން ލެވޭނެ ކަމަށްވެސް ވިދާޅުވިއެވެ.
1:27 ރިޔާސީ އިންތިޚާބު ބާތިލް ކޮށްދިނުމަށްއެދި ހުށަހެޅި މައްސަލައިގެ ޝަރީއަތް ހުސްވަގުތަށް މެދުކަނޑާލައިފި
ރިޔާސީ އިންތިޚާބު ބާތިލް ކޮށްދިނުމަށްއެދި ހުށަހެޅި މައްސަލައިގެ ޝަރީއަތުގެ ދެވަނަ އަޑުއެހުން ފަށައިފިއެވެ.
ރިޔާސީ އިންތިޚާބު ބާތިލްކޮށްދެއްވުމަށް އެދި ސްޕްރީމްކޯޓަށް ހުށަހެޅުއްވީ ޕީޕީއެމްގެ ފަރާތުން ރިޔާސީ އިންތިޚާބުގައި ވާދަކުރެއްވި ރިޔާސީ ކެންޑިޑޭޓް ރައީސް އަބްދުﷲ ޔާމީން އަބްދުލްގައްޔޫމެވެ.
އެމަނިކުފާނުގެ ފަރާތްޕުޅުން ހުށަހެޅުއްވި މައްސަލައާ ބެހޭގޮތުން އިލެކްޝަންސް ކޮމިޝަނުން ވިދާޅުވީ ސްޕްރީމްކޯޓަށް ހުށަހަޅުއްވައިފައިވަނީ ޚިޔާލީކަންކަން ކަމަށެވެ. ކޯޓަށް ހުށަހަޅުއްވައިފައިވަނީ އަނގޮޓިއެއްގެ ވާހަކައާއި، ފާހަގަފޮހެވޭ ކޮމިކަލެއްގެ ވާހަކައާއު، މިފަދަ ކަންކަމެވެ. ވޯޓު ކަރުދާސް ޗާޕްކޮށްފައިވަނީ އެމް 7 އިންނެވެ. އެތަނުން ބުނެފައިވަނީ ވޯޓުކަރުދާހުގެ ނަމޫނާއެއް ވެސް އަދި އެފަދަ އެހެން އެއްޗެއްވެސް ބޭރުން ފެނުމަކީ ނާދިރު ކަމެއްކަމަށެވެ. ކަރުދާސް ޗާޕުކުރިއިރު ސިފައިންނާއި، ފުލުހުން ވެސް އެތަނުގައި ހަރަކާތްތެރިވި ކަމަށް ވެސް އެތަނުން ވަނީ ބުނެފައެވެ.
މި ޝަރީއަތުގެ ފުރަތަމަ އަޑުއެހުން ބާއްވައިފައިވަނީ އިއްޔެއެވެ. އިއްޔެގެ އަޑުއެހުމުގައި ޕީޕީއެމް ނުވަތަ ރައީސް ޔާމީންގެ ފަރާތްޕުޅުން ވިދާޅުވެފައިވަނީ ސިއްރު ހެކި ހުށަހެޅުމުގެ ފުރުސަތަށް އެދިފައެވެ. އެނގިފައިވާ ގޮތުގައި އެފުރުސަތު މިހާރުވަނީ ދީފައެވެ. މިކަމާ ގުޅިގެން ކުރީގެ ރައީސް އަދި ދީނީ އިލްމުވެރިޔާ މައުމޫން އަބްދުލްގައްޔޫމް ވިދާޅުވެފައިވަނީ ސިއްރު ހެއްކަކީ އިސްލާމްދީނުގައި އޮންނަ އެއްޗެއް ނޫން ކަމަށެވެ.
އިއްޔެއެކޭ އެއްގޮތަށް މިއަދުގެ އަޑުއެހުމަށް ވަރަށްގިނަ މީހުންވަނީ ސްޕްރީމް ކޯޓު ދޮށަށް ޖަމާވެފައެވެ. އެހެންނަމަވެސް އިއްޔެ ގޮތަށް ހަލަބޮލި ކަމެއްނެތެވެ. ފުލުހުން ވަނީ އެއްވެތިބި މީހުން ފަހަތަށް ޖައްސައިފައެވެ.
