ރައީސް އަބްދުﷲ ޔާމީންގެ ސަރުކާރު ވެގެން ގޮސްފައިވަނީ ރައްޔިތުންގެ ހަށިގަނޑައާއި ފުރާނައިގެ ރައްކާތެރި ކަމަށް އެންމެ ބޮޑަށް އިހުމާލުވި ސަރުކާރު ކަމަށް އެމްޑީޕީން ބުނެފިއެވެ.
އެމްޑީޕީން އެހެން ބުނެފައިވަނީ މާރާމާރީއެއްގައި އުމުރުން 14 އަހަރުގެ ކުއްޖަކަށް ހަމަލާދީ މަރާލައިފައިވާތީ އެކަން ކުށްވެރިކޮށް ނެރުނު ބަޔާނެއްގައެވެ. އެމްޑީޕީން ބުނެފައިވަނީ މިސަރުކާރުން ވަނީ ރައްޔިތުންގެ ފުރާނައިގެ ރައްކާތެރިކަން ގެއްލުވާލައި މުޖުތަމައުގެ އަމާންކަން ނަގާލައިފައި ކަމަށެވެ.
މިސަރުކާރުގައި ވަނީ ވަޅިހަރައިގެން ރެކޯޑު އަދަދަކަށް މީހުން މަރައިފައި ކަމަށްވެސް އެމްޑީޕީން ބުނެފައިވެއެވެ. މިސަރުކާރުން ގެންދަނީ ސިޔާސީ ބޭނުންތައް ފުއްދުމަށް މުއައްސަސާތަކާއި ތަހުގީގީ އިދާރާތަކުގެ ބޭނުން ނަހަމަގޮތުގައި ބޭނުން ކުރަމުން ކަމަށް ވެސް އެމްޑީޕީން ބުނެފައިވެއެވެ.
އެންމެފަހުން ރާއްޖޭގައި ބޭއްވި ރިޔާސީ އިންތިޚާބާ ހަމައަށް ވެސް ސަރުކާރުން ވިދާޅުވަމުން ގެންދެވީ ރާއްޖެގައި ގޭންގުތައްނެތް ކަމަށާއި، ޓެގްއަޅުވައިގެން މީހުން ގެންގުޅުމުގެ ބޭނުން މިހާރު ކެނޑިފައިވާ ކަމަށް ސަރުކާރުން އޭރުވެސް ވިދާޅުވި ކަމަށް އެމްޑީޕީން ބުނެފައިވެއެވެ.
