ފަނޑިޔާރަކު ބަންދުކުރި މައްސަލައަކާ ގުޅިގެން 13 އަހަރުގެ ޖަލު ހުކުމެއް ކުރައްވައިފައިވާ ކުރީގެ ރައީސް މުހައްމަދު ނަޝީދު އިނގިރޭސި ވިލާތުން ރާއްޖެ ވަޑައިގެންނެވުމުން އަނެއްކާވެސް ޖަލަށް ގެންދާތަން ބަލަން ބޭނުންފުޅު ނުވާ ކަމަށް ޖުމްހޫރީޕާޓީގެ ބާނީ ގާސިމް އިބްރާހީމް ވިދާޅުވެއްޖެއެވެ.
ގާސިމް މިހެން ވިދާޅުވީ އަލްހާން ފަހުމީ ކުރެއްވި ޓްވީޓެއް ރީޓްވީޓް ކުރެއްވި މައްސަލާގައި އެމްޑީޕީގެ ސަޕޯޓަރުން ގަޔާ ނުވެގެން ސޯޝަލް މީޑިއާގައި ގާސިމަށް ފާޑުކިޔަން ފެށުމުން ވީޓީވީއަށް ދެއްވި އިންޓަރވިއުއެއްގައެވެ.
ގާސިމް ވިދާޅުވެފައިވަނީ އެ ޓްވީޓުގައި އަލްހާން ވިދާޅުވެފައިވަނީ ރަނގަޅު ވާހަކަތަކެއް ކަމަށެވެ. އޭގައި އަލްހާން ވިދާޅުވެފައިވަނީ ރައީސް ނަޝީދެއް ކަމަކު އުސޫލުން ބޭރުން މިނިވަން ވެގެން ނުވާނެކަމަށެވެ. ގާސިމް ވިދާޅުވީ ރައީސް ނަޝީދު މާލެ ވަޑައިގެންނެވުމުގެ ކުރިން އެމަނިކުފާނުގެ މައްސަލަ ކޯޓަށް ހުށަހަޅުއްވައި އެކަން އަލުން މުރާޖައާކޮށް ދެއްވުމަށް އެދިވަޑައިގެންނެވުން ރަނގަޅު ކަމަށެވެ. އެއަށްފަހު ކޯޓު މެދުވެރި ކުރައްވައި މިނިވަންވެ މިނިވަނެއްގެ ގޮތުގައި ރާއްޖެ ވަޑައގެންނެވުމަކީ މުހިންމު ކަމެއް ކަމަށް ދެކެވަޑައިގަނަންވާ ކަމަށެވެ.
ރައީސް ނަޝީދަކީ ގައުމަށް އެތައް ޚިދުމަތްތަކެއް ކޮށްދެއްވައިފައިވާ ބޭފުޅެއް ކަމަށާއި އެމަނިކުފާނަށް ބޭއިންސާފުން ޝަރީއަތްކޮށް ހުކުމް އިއްވުމުން ބޭރުގެ ފަރާތްތަކުން ވެސް އެކަމަށް ދެކޮޅު ހެދި ކަމަށް ގާސިމް ވިދާޅުވިއެވެ. ޚުދު ގާސިމް ވެސް އެކަމަށް ދެކޮޅު ހެއްދެވި ކަމަށާއި އެކަމާ ދެކޮޅަށް ވާހަކަ ދެއްކެވުމުން އޭރުގެ ޕީޖީގެ އިންޒާރެއް ވެސް ގާސިމަށް ލިބިވަޑައިގެންނެވި ކަމަށް އޭނާ ވިދާޅުވިއެވެ.
