ސެޕްޓެމްބަރ 23 ގައި ރާއްޖޭގައި ބޭއްވި ރިޔާސީ އިންތިޚާބާ ގުޅޭ ދުސްތޫރީ މައްސަލައެއް ރައީސް ޔާމީންގެ ފަރާތްޕުޅުން ސްޕްރީމް ކޯޓަށް މިއަދު ހުށަހަޅުއްވައިފިއެވެ.
ރައީސް ޔާމީންގެ ގާނޫނީ ވަކީލުންގެ ޓީމުންގެ ފަރާތުން ވާހަކަ ދައްކަވަމުން މުހައްމަދު ސަލީމް (ރޭނީސް) ވިދާޅުވީ ރިޔާސީ އިންތިޚާބަށް ފަހު ޕީޕީއެމުގެ ސަޕޯޓަރުންގެ ފަރާތުން ބައިވަރު ޝަކުވާތައް ހުށަހަޅާފައިވާ ކަމަށެވެ. އެހެން ކަމުން އެ މައްސަލަތައް ދުސްތޫރީ މައްސަލައެއް ގޮތުގައި ސްޕްރީމް ކޯޓަށް ހުށަހެޅުއްވީ ރައީސް ޔާމީން ބެއްލެވުމަށްފަހު ކަމަށެވެ. އެހެންނަމަވެސް ހުށަހެޅޯ ކޮން މައްސަލައެއް ކަމެއް ހާމައެއްނުކުރައްވައެވެ.
އެޕާޓީން ނެރެފައިވާ ބަޔާނެއްގައި ބުނެފައިވަނީ ޕާޓީގެ ރިޔާސީ ކެންޑިޑޭޓައި ރަނިންމޭޓުގެ އިންތިޚާބީ ހައްގުތަކެއް ގެއްލިފައިވާ ކަމަށެވެ. އެހެންކަމުން އެބޭފުޅުންނާއި ރައީސް ޔާމީނަށް ވޯޓު ދެއްވި މީހުންގެ ހައްގުގައި އެ މައްސަލަ ކޯޓަށް ވެއްދީ ކަމަށް ވެސް ބަޔާނުގައި ބުނެފައިވެއެވެ.
އިލެކްޝަންސް ކޮމިޝަންގެ ރައީސް އަހުމަދު ޝަރީފް ވިދާޅުވީ އިންތިޚާބުގައި އެއްވެސް މައްސަލައެއްނެތް ކަމަށާއި ފޮށިތަކުގެ ތަފްސީލަށް ދާނދެން ކެންޑިޑޭޓުންނާ މިހާރު ހިއްސާ ކުރައްވައިފައިވާނެ ކަމަށެވެ.
