އެމެރިކާއިން އދ. އަށް ކަނޑައަޅާފައި ހުންނަވާ ސަފީރުގެ މަގާމުގައި ހުންނެވި ނިކީ ހޭލީ އިސްތިއުފާދެއްވަައިފިއެވެ. ސައުތު ކެރޮލައިނާގެ ގަވަރުނަރުކަންވެސް ކުރިން ކުރައްވާފައިވާ ނިކީ ހޭލީ މިއަދު ވިދާޅުވީ މިއަަހަރުގެ ނިޔަލަށް އޭނާ މަގާމު ދޫކޮށްލައްވާނެ ކަމުގައެވެ.
ހޭލީއަކީ ޓްރަމްޕަށް ކުރިން ވަރަށް ބޮޑަށް ފާޑުވިދާޅުވި ބޭފުޅަކަށް ވުމުން، އދ. އަށް ކަނޑައަޅާފައި ހުންނަވާ ސަފީރުގެ މަގާމަށް އައްޔަން ކުރުން ބެލެވުނީ ޓްރަމްޕް އޭނާއަށް ދިއްކޮށްލެއްވި ޒައިތޫނި ކޯޅިއެެއް ކަމުގައެވެ.
"ދަގަނޑު ދަހަނާ އަޅައިގެން އދ. އަށް ގޮސް ކޮންމެ ދުވަހަކު އެމެރިކާ ދިފާއުކުރުމުގެ މަސައްކަތުގައި އުޅުމަކީ ދެއްވި ނިއުމަތެއް." ވައިޓް ހައުސްގެ އޯވަލް އޮފީހުގައި ރައީސު ޓްރަމްޕް ކައިރީގައި އިންނަވައިގެން ނިކީ ހޭލީ ވިދާޅުވިއެވެ. "ހަގީގަތުގައި އަަހަރުމެންގެ ގަައުމަށްޓަކާ ހަނގުރާމަކުރުމުން ދުވަހަކުވެސް ފަހަތަށް ޖެހޭކަށް އަހަރެން ނެތިން. އެހެންނަމަވެސް، އަހަރެން ބުނަން އޮތީ މިހާރު ވަގުތު ޖެހިއްޖެއޭ." އޭނާ ވިދާޅުވިއެވެ.
އޭނާގެ އަރިހުގައި ހުންނަވައިގެން ޓްރަމްޕް ވަނީ އެހެން މަގާމަކަށް ވަޑައިގަތުމަށް އޭނާއަށް ދައުވަތު ދެއްވާފައެވެ. "ބޭނުން މަގާމެއް އިޚްތިޔާރު ކުރައްވަންވީ." ނިކީ ހޭލީއާ މުޚާާޠަބުކުރައްވައި ޓްރަމްޕް ވިދާޅުވިއެވެ.
ނިކީ ހޭލީ ކުއްލި ގަޮތަކަށް އިސްތިއުފާދެއްވި ހަގީގީ ސަބަބު ނޭނގުނު ނަމަވެސް ތަފާތު ގޮތްގޮތަށް ދަނީ ވާހަކަދެެކެވުމުންނެވެ. އެއްބަަޔަކު ބުނާ ގޮތުން އޭނާ އިސްތިއުފާ ދެއްވީ މާލީ ސަބަބުތަަކަށް ޓަކައެވެ. އޭނާގެ އެެއް ކުއްޖަކު ކޮލެޖުގައި ކިޔަވަމުން ދާއިރު، އަނެއްކުއްޖާ ދަނި ކޮލެޖަށް ވަނުމަށް ތައްޔާރުވަމުންނެވެ. އެކަމަށް އިތުރު ފައިސާ ހޯއްދަވަން އޭނާ ބޭނުންފުޅު ވެއެވެ.
އަނެއް ސަބަބުކަމަށް ބުނެވެނީ ރައީސު ޓްރަމްޕަށް އޭނާގެ މުހިއްމުކަން ކުޑަވުމެވެ. ޚާރިޖީ ވަޒީރުކަމުގައި ރެކްސް ޓިލާސަން ހުންނެވި އިރު ޚާރިޖީ ދާއިރާގައި ހޭލީގެ ނުފޫޒު ގަދައެވެ. ބައެއް ފަހަރު ރައީސު ޓްރަމްޕް އޭނާއާއި ޚާރިޖީ ކަންކަމުގައި މަޝްވަރާކުރައްވައެވެ. މައިކް ޕޮމްޕެއޯ ޚާރިޖީ ވަޒީރުކަމަށް ވަޑައިގަތުމާއެކު އޭނާގެ މުހިއްމުކަން ކުޑަވިއެވެ. އަދި ރައީސު ޓްރަނޕް އޭނާއާ ވަޝްވަރާ ނުުކުރައްވައެވެ.
ނިކީ ހޭލީ 2020 ވަނަ އަހަރުގެ ރިޔާސީ އިންތިޚާބުގައި ވާދަކުރައްވާނެ ކަމަށް ދެކެވޭ ވާހަކަތައް އޭނާ ވަނީ ދޮގުކުރައްވާފައެވެ. ވައިޓް ހައުސްގައި ޓްރަމްޕް ކައިރީގައި އިންނަވާފައި ޓްރަމްޕަށް އިޝާރާތްކުރައްވައި އޭނާ ވިދާޅުވީ "އަހަރެން ކެންޕޭންކުރާނީ މިބޭފުޅާއަށްކަން އަހަރެންނަށް ޔަގީންކޮށްދެވިދާނެ. އެހެންކަމުން އަހަރެން އިންތިޒާރު މިކުރަނީ ދެން އަންނަ އިންތިޚާބުގައި ރައީސުގެ ތާއީދުގައި ނުކުންނަން." އޭނާ ވިދާޅުވިއެވެ.
"ތިއީ ވަރަށް ރަނގަޅު ކަމެއް. ޝުކުރިއްޔާ ނިކީ" އޭނާ ކައިރީގައި ހުންނަވައިގެން ރައީސު ޓްރަމްޕް ވިދާޅުވިއެވެ.
