ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު މުހައްމަދު އަމީތާއި، ދިއްދޫ ދާއިރާގެ މެމްބަރު އަބްދުއްލަތީފް މުހައްމަދާއި، ވިލިގިލީ ދާއިރާގެ މެމްބަރު ސައުދު ހުސައިންގެ މެމްބަރު ކަމުގެ ގޮނޑި ވެސް ނުގެއްލޭ ކަމަށް ސްޕްރީމް ކޯޓުން މިއަދު ހުކުމްކުރައްވައިފިއެވެ.
އަމީތުގެ ގޮނޑި ގެއްލިފައިވާ ކަމަށް އިލެކްޝަންސްކޮމިޝަނުން ކަނޑައެޅުމަށްފަހު އެދާއިރާގެ ބައިއިލެކްޝަން ބާއްވަން ވެސް އެކޮމިޝަނުން ނިންމިއެވެ. އެ ކޮމިޝަނުން އެގޮތަށް ނިންމެވީ ހުސްވިއަހަރު ޖުލައިމަސް ތެރޭގައެވެ. އެގޮތަށް ނިންމީ އެމްބަރަކު މަޖިލީހަށް އިންތިޚާބުވާ ޕާޓީން ވަކިވެ ނުވަ ވަކިކޮށްފި ކަމަށްވާނަމަ މެމްބަރުކަމުގެ ގޮނޑި ގެއްލޭ ގޮތަށް ސުޕްރީމް ކޯޓުން 2017 ވަނަ އަހަރު ނިންމެވުމުންނެވެ.
އަމީތުގެ އިތުރަށް ރައްޔިތުންގެ މަޖިލީހުގެ ދިއްދޫ ދާއިރާގެ މެމްބަރު އަބްދުއްލަތީފް މުހައްމަދުގެ މެމްބަރު ކަމުގެ ގޮނޑި ނުގެއްލޭ ކަމަށް ވެސް ސުޕްރީމް ކޯޓުން މިއަދު ހުކުމް ކުރެއްވިއެވެ.
ލަތީފްގެ މެމްބަރުކަމުގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ކަނޑައެޅީ ވެސް މަޖިލީހަށް އެ މެމްބަރަކު އިންތިޚާބުވާ ޕާޓީން ވަކިވާ ނުވަތަ ވަކިކުރާ މެމްބަރުންގެ ގޮނޑި ގެއްލޭ ގޮތަށް ސުޕްރީމް ކޯޓުން ކުރެއްވި ހުކުމުގެ ދަށުންނެވެ.
އޭނާގެ ގޮނޑި ގެއްލިޖެ ކަމަށް ނިންމެވުމުން އޭނާވަނީ އެމައްސަލަ ސްޕްރީމްކޯޓަށް ހުށަހަޅައިފައެވެ. އެ މައްސަލަ ބެލުމަށްފަހު މެމްބަރުކަމުގެ ގޮނޑި ނުގެއްލޭ ކަމަށް ސުޕްރީމް ކޯޓުން ހުކުމްކުރީ ކޯޓުގެ ފަސްފަނޑިޔާރުންގެ އިތިފާގުންނެވެ.
ލަތީފުގެ އިތުރަށް ރައްޔިތުންގެ މަޖިލީހުގެ ވިލިގިލީ ދާއިރާގެ މެމްބަރު ސައުދު ހުސައިންގެ މެމްބަރު ކަމުގެ ގޮނޑި ވެސް ނުގެއްލޭ ކަމަށް ސްޕްރީމްކޯޓުން މިއަދު ހުކުމްކުރެއްވިއެވެ.
ސައުދުގެ ގޮނޑި ގެއްލިފައިވާ ކަމަށް އިލެކްޝަނުން ނިންމެވީ 2017 ވަނަ އަހަރުއެވެ. އޭނާގެ ގޮނޑި ގެއްލިއްޖެ ކަމަށް އީސީން ނިންމެވީ ވެސް މަޖިލީހަށް އެމެމްބަރަކު އިންތިޚާބުވާ ޕާޓީން ވަކިވާ ނުވަތަ ވަކިކުރާ މެމްބަރުންގެ ގޮނޑި ގެއްލޭ ގޮތަށް މިދިޔަ އަހަރު ސުޕްރީމް ކޯޓުން ކުރި ހުކުމަށް ރިއާޔަތް ކުރައްވައެވެ. މި ބޭފުޅުންގެ އިތުރަށް ލޯޔަރު ވައްޑެގެ ގޮނޑި ނުގެއްލޭ ކަމަށް ވެސް ސްޕްރީމް ކޯޓުން މިއަދު ނިންމެވިއެވެ.
