ރައްޔިތުންގެ މަޖިލީހުގެ ތުލުސްދޫ ދާއިރާގެ މެމްބަރު މުހައްމަދު ވަހީދު އިބްރާހީމް (ލޯޔަރު ވައްޑެ) ގެ ގޮނޑި ނުގެއްލޭ ކަމަށް ސްޕްރީމްކޯޓު (އެސްސީ) އިން ހުކުމް ކުރައްވައިފިއެވެ.
މިއަދު ބޭއްވި ޝަރީއަތުގެ އަޑުއެހުމަށްފަހު ސްޕްރީމް ކޯޓުން ކުރައްވައިފައިވާ ހުކުމުގައި ވިދާޅުވެފައިވަނީ ވައްޑެގެ ގޮނޑި ގެއްލިފައިވާ ކަމަށް އިލެކްޝަންސްކޮމިޝަނުން ނިންމަވައިފައިވާ ނިންމެވުމަކީ ބާތިލް ނިންމެވުމެއް ކަމަށެވެ. ވައްޑެގެ ގޮނޑި ގެއްލިފައިވާ ކަމަށް އިލެކްޝަންސް ކޮމިނުން ފާސްކުރައްވައިފައިވަނީ 2018 ވަނަ އަހަރު ޖުލައި 18 ވަނަ ދުވަހުއެވެ.
ވައްޑެގެ ގޮނޑި ގެއްލިއްޖެކަމަށް އިލެކްޝަންސް ކޮމިޝަނުން ނިންމަވައި އެކަން މަޖިލީހަށް އެންގެވީ 2017 ވަނަ އަހަރު ޖުލައި 13 ގައި ސްޕްރީމް ކޯޓުން ކުރެއްވި ހުކުމަކާ ގުޅިގެންނެވެ. އެ ހުކުމުގައި ވިދާޅުވެފައިވަނީ އެ ތާރީޚަށްފަހު އެ މެމްބަރަކު މަޖިލީހަށް އިންތިޚާބުވި ޕާޓީން ވަކިވިޔަސް އަދި ވަކި ކުރިނަމަވެސް އެ މެމްބަރެއްގެ ގޮނޑި ގެއްލޭނެ ކަމަށެވެ. މިއަދާ ހަމައަށް ވެސް ވައްޑެ ވިދާޅުވަމުން ވަޑައިގަންނަވަނީ ސްޕްރީމްކޯޓުގެ ހުކުމުގެ ކުރިން އޭނާ ޕީޕީއެމުން ވަކޮކޮށްފައިވާ ކަމަށެވެ. އެކަމުގެ ލިޔެކިޔުންތައް ވެސް އެބަހުރި ކަމަށް އޭނާ ވަޑައިގެންނެވީ ވިދާޅުވަމުންނެވެ.
ވައްޑެގެ އިތުރަށް އިތުރު 3 މެމްބަރެއްގެ ގޮނޑިއާމެދު ސްޕްރީމް ކޯޓުން މިއަދު ގޮތެއް ނިންމެވުމަށްވަނީ ތާވަލް ކުރައްވައިފައެވެ. ވައްޑެގެ އިތުރަށް ދެން ތިއްބެވީ ވިލިގިލީ ދާއިރާގެ މެމްބަރު ސައުދު ހުސައިން، ދިއްދޫ ދާއިރާގެ މެމްބަރު އަބްދުއްލަތީފް މުހައްމަދު، މަޑުއްވަރީ ދާއިރާގެ މެމްބަރު މުހައްމަދު އަމީތެވެ.
މި މެމްބަރުންގެ ގޮނޑި ގެއްލުނު ކަމަށް ނިންމުމަފަށްފަހު އަލުން އެކަން ބެލުމަށްފަހު އިލެކްޝަންސް ކޮމިޝަނުން ވަނީ އެ ނިންމުން ބާތިލް ކުރައްވައިފައެވެ. އެހެންނަމަވެސް އެއީ ސްޕްރީމްކޯޓަށް ހުށަހެޅި އެތަނުން ބަލަމުންދާ މައްސަލަތަކަށް ވާތީ އީސީގެ ނިންމުން ސްޕްރީމްކޯޓުންވަނީ ބަދަލުކުރައްވައިފައެވެ.
