މާލެ އަތޮޅު ހުދުރަންފުށި ރިސޯޓްގެ މޫދު ކޮޓަރިތަކުގައި ރޭ ރޯވެ ތިން ކޮޓަރިއެއް ބޭނުން ނުކުރެވޭ ވަރަށް އަނދައިފިއެވެ.
އެމްއެންޑީއެފްގެ ތަރުޖަމާނު ކެޕްޓަން އިބްރާހީމް އާޒިމް ވިދާޅުވީ އެ ތިން ކޮޓަރި ބޭނުން ނުކުރެވޭ ވަރަށް އަނދައި ބޮޑެތި ގެއްލުންތަކެއް ލިބިފައިވާ ކަމަށެވެ. އޭގެ އިތުރަށް އިތުރު ކޮޓަރިއަކަށް ވެސް ވަނީ އެކިވަރުގެ ގެއްލުން ލިބިފައި ކަމަށް އޭނާ ވިދާޅުވިއެވެ. މިހާދިސާގައި އެއްވެސް މީހަކަށް ގެއްލުމެއް ލިބިފައެއް ނުވެއެވެ.
މިހާދިސާގެ ރިޕޯޓް އެމްއެންޑީއެފަށް ލިބިފައިވަނީ ރޭ ދަންވަރު 2:00 އެހައިކަންހާއިރު ކަމަށް ވެސް އާޒިމް ވިދާޅުވިއެވެ. އެ މައުލޫމާތު ލިބުމުން އެފްއާރުއެސްގެ ފަޔަރ ފައިޓަރުން އެ ރިސޯޓަށް ގޮސް ރޯވެފައިވާ އަލިފާންގަނޑު ނިއްވުމުގެ މަސައްކަތް ވަނީ ކޮށްފައެވެ. އެ މަސައްކަތް ކޮށްފައިވަނޯ އެފްއާރުއެސްގެ ސިފައިންނާއި ހުދުރަންފުށި ރިސޯޓްގެ ފަޔަރ ސްކޮޑްގެ ސްޓާފުންނެވެ. ގުޅިގެން ކުރި މަސައްކަތުން ރޯވެފައިވާ އަލިފާން އެއްކޮށް ނިއްވާލެވިފައިވަނީ ފަތިހު 4:30 އެހައިކަންހާއިރުއެވެ.
ފުލުހުން ގެންދަނީ މިހާދިސާ ތަހުގީގު ކުރަމުންނެވެ.
