މިމަހުގެ 23 ވަނަ ދުވަހު އޮތް ރިޔާސީ އިންތިޚާބުގެ ނަތީޖާ ވެރިކަންކުރާ ޕީޕީއެމުން ގަބޫލުނުކޮށް ކޯޓަށް ހުށަހެޅި ނަމަވެސް އެއްވެސް ކޯޓަކުންވެސް ދެން އިންތިޚާބު ބާތިލު ކުރަން ނިންމުމެއް ނިންމާނެ ކަމަށް ގަބޫލުފުޅު ނުކުރައްވާ ކަމަށް ކުރީގެ ރައީސް މައުމޫން އަބްދުލްގަތްޔޫމް މިއަދު ވިދާޅުވެއްޖެއެވެ.
ޖޭޕީގެ ލީޑަރު ގާސިމް އިބްރާހިމްއާއެކު ނޫސްވެރިންނާ މިއަދު ބައްދަލު ކުރައްވައި މައުމޫން ވިދާޅުވީ އިންތިޚާބުގެ ވޯޓުލުން ކުރިޔަށް ދިޔައީ ވަރަށް ރަނގަޅަށް ކަމަށާއި ވޯޓު ލައިނިމި، ވޯޓު ގުނައި ނިމި، ވަގުތީ ނަތީޖާވެސް އިއްވައި އަދި ދާއިމީ ނަތީޖާވެސް އިއްވައި، އަދި ރައީސް ޔާމީން ބަލި ގަބޫލު ކުރައްވާފައި ވަނިކޮށް މިހިސާބަށް ގޮސްފައި އޮއްވާ އިންތިޚާބު ބާތިލު ކުރުމަކީ ދެން ކުރެވޭނެ ކަމެއް ނޫން ކަމަށެވެ.
މައުމޫން ވިދާޅުވީ އިންތިޚާބުގެ ނަތީޖާ މުޅިދުނިޔެވެސް ގަބޫލުކޮށްފި ކަމަށާއި ބޭބެއެއްގެ ޙައިސިއްޔަތުން ކޮއްކޮއަކަށް ދޭން އޮތް ވަކި ނަސޭހަތެއް ނެތް ކަމަށެވެ. ނަމަވެސް ދިވެހި ރައްޔިތެއްގެ ޙައިސިއްޔަތުން ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގަތްޔޫމްއަށް ދޭން އޮތް ނަސޭހަތަކީ ރައްޔިތުން ނިންމި ނިންމުން ގަބޫލު ކުރައްވައި ރީތި ގޮތުގައި ގެޔަށް ވަޑައިގަތުމަށް އެދިވަޑައިގަތުން ކަމަށެވެ.
މައުމޫން ވިދާޅުވީ 2008 ވަނަ އަހަރުގެ ރިޔާސީ އިންތިޚާބުގެ ދެވަނަ ބުރުގެ ނަތީޖާ އެމަނިކުފާނު ގަބޫލު ނުކުރެއްވި ކަމަށް ޕީޕީއެމްގެ ނައިބު ލީޑަރ އަބްދުއްރަޙީމް ވިދާޅުވުމަކީ ރަނގަޅު ގޮތެއް ނޫން ކަމަށެވެ. އެ އިންތިޚާބަށް ފަހު މައުމޫން އަރިހުގައި ތިއްބެވި ބަޔެއް ބޭފުޅުން ނަތީޖާ ގަބޫލު ނުކުރައްވައި އަލުން ވޯޓަކަށް ދިޔުމަށް ލަފާ ދެއްވި ނަމަވެސް އެރޭ ދަންވަރު އެމަނިކުފާނު އޭރުގެ އިންތިޚާބީ ރައީސް ނަޝީދަށް ގުޅުއްވައި ތަހުނިޔާ ވިދާޅުވި ކަމަށެވެ. އަދި ޖެހިގެން އައިދުވަހު ރައީސް އޮފީހުގައި ރައީސް ނަޝީދާއެކު ބައްދަލު ކުރައްވައި ރައްޔިތުންނާ ބައްދަލު ކުރައްވައި ވާހަކަ ދެއްކެވި ކަމަށެވެ. އަދި ވެރިކަން ބަދަލު ކުރުމުގެ ކަންކަން ވަރަށް ރީތިކޮށް ގެންދެވި ކަމަށް މައުމޫން ވިދާޅުވިއެވެ.
"ކޮންމެހެން އަޅުގަނޑު މާމޮޅު ކަމެއް ކުރި ވާހަކައެއްނޫން މިދެންނެވީ، އެއީ ގާނޫނުގައި އެކަން އޮތްގޮތް، ބަލިވުމަކީ ލަދު ގަންނަންޖެހޭ ކަމެއްވެސްނޫން، ދެމީހުން ވާދަކުރާއިރު ކޮންމެވެސް އެކަކު މޮޅުވާނެ" މައުމޫން ވިދާޅުވިއެވެ.
